बांधकाम कामगार मंडळाचे
बंद पोर्टल त्वरित सुरू करा

लाल बावटा बांधकाम कामगार संघटनेचे मागणी

सकाळ वृत्तसेवा

म्हाकवे, ता. २० : लोकसभा निवडणुकीची आचारसंहिता लागू झाल्याने महाराष्ट्र राज्य इमारत व इतर बांधकाम कामगार कल्याणकारी मंडळाने नोंदणी, नूतनीकरण, लाभाचे ऑनलाईन अर्जाचे पोर्टल बंद केले आहे. ते पूर्ववत सुरू करावे, अशी मागणी लाल बावटा बांधकाम कामगार संघटनेने महाराष्ट्र राज्य इमारत व इतर बांधकाम कामगार कल्याणकारी मंडळाचे सचिव विवेक कुंभार यांच्याकडे निवेदनाद्वारे केली आहे.
निवेदनातील आशय असा, लाभाचे अर्ज भरण्यासाठी कामगार नोंदीत असणे गरजेचे आहे. जो कामगार आचारसंहिता लागण्यापूर्वी, म्हणजेच १६ मार्च २०२४ पूर्वी नोंदीत झालेला आहे अशा कामगारांचे लाभाचे अर्ज भरण्यासाठी पोर्टल सुरू करावे. तसेच नूतनीकरणाचे कामकाज हे रेग्युलर काम असल्याने नूतनीकरणाचे पोर्टलही सुरू करावे. एखाद्या कामगारांचे आचारसंहितेच्या कालावधीत नूतनीकरण न झाल्यास व अशा कामगाराचा अनावधानाने मृत्यू झालेस त्याच्या वारसांना मंडळाकडुन मिळणाऱ्या लाभापासून वंचित राहावे लागणार आहे. निवेदनावर बांधकाम कामगार कल्याणकारी मंडळ सदस्य भरमा कांबळे, शिवाजी मगदूम, जिल्हा सचिव बांधकाम कामगार संघटना यांच्या सह्या आहेत.