विकासकामांच्या दर्जाबाबत मलकापूरला तक्रारी
मलकापूर, ता. २ ः शासनाच्या नगरोत्थान योजनेतून येथे ८७ लाख, ४५ हजारांची विकासकामे सुरू आहेत. काही पूर्णही झाली आहेत. मात्र पालिकेच्या बांधकाम विभागाकडून या कामांची प्रत्यक्ष देखरेख व नियंत्रण होत नसल्याने कामे निकृष्ठ व मापांनुसार होत नसल्याच्या तक्रारी नागरिकांतून होत आहेत.
नगरोत्थान योजनेतून हनुमान तालीम परिसर, जुनी नगरपालिका, बुरूडगल्ली, साक्रे बोळ, महादेव मंदिर जाधववाडी नाकासह अन्य भागात आरसीसी गटर, कॉंक्रिट रस्ताकामे सुरू आहेत. त्यासाठी ८७ लाख ४५ हजार ९६० रूपयांचे अनुदान खर्च केले जात आहे. मात्र कामांवर पालिका बांधकाम विभागाचे दुर्लक्ष आहे. वाळू, खडी व सिमेंटचा योग्य वापर होत नाही. बांधकामानंतर पाणी मारले जात नाही. परिणामी कामे निकृष्ठ व दर्जाहीन होत आहेत. तशा तक्रारी होत आहेत.
येथील बांधकाम अभियंता पद रिक्त आहे. पन्हाळा पालिकेतील अभियंत्यांकडे येथील अतिरिक्त कार्यभार आहे. त्यांच्याकडून कामांवर प्रत्यक्ष देखरेख होत नाही. बांधकाम विभागाकडून कामातील अनियमितपणा, दुर्लक्ष व नागरिकांच्या तक्रारींची दखल घेत प्रशासन प्रमुखांनी संबंधित बांधकाम अभियंतांना वारंवार लेखी सूचना दिल्या. मात्र तरीही कामात सुधारुणा होत नसलेने आश्चर्य व्यक्त होत आहे.

कोट-
येथील बांधकामांबाबत नागरिकांच्या तक्रारी आहेत. त्यासंदर्भात मुख्याधिकाऱ्यांची प्रत्यक्ष भेट घेऊन चर्चा केली. कामांचा दर्जा सुधारण्यांसाठी उपाययोजना करावी; अशी मागणी केली आहे. चालू कामांची माहिती मागितली आहे.
- प्रवीण प्रभावळकर (माजी उपनगराध्यक्ष)

बांधकामांच्या दर्जाबाबत संबंधितांना वेळोवेळी सूचना दिल्या आहेत. योग्य ती दक्षता न घेतल्यास कारवाई करू.
- विद्या कदम, पालिका प्रशासक