कोल्हापूर - चौफेर पर्यटन विकास व्हावा, कृषिपूरक उद्योगांना बळ द्यावे, प्राधिकरणातील गावांत पायाभूत सुविधा सक्षम कराव्यात, शहरात बहुद्देशीय सभागृह व्हावे, अशा सुविधा सक्षम केल्यास शहरातील गर्दी कमी होण्यास मदत होईल; त्यातून जागा, इमारतींचे भाव आटोक्‍यात राहतील. तेव्हाच सर्वसामान्यांचे घराचे स्वप्न साकारणे शक्‍य होईल. क्रिडाई संस्थाही त्याला बळ देईल, असा विश्‍वास ‘क्रिडाई’च्या पदाधिकाऱ्यांनी ‘सकाळ’ कार्यालयात झालेल्या ‘कॉफी वुईथ सकाळ’मध्ये व्यक्त केला.

शहरात पर्यटक मोठ्या संख्येने येतात. अंबाबाई मंदिर, जोतिबा, पन्हाळा, रंकाळा अशी ठराविक ठिकाणे पाहून झाली की त्यांचे पर्यटन संपते. त्यामुळे पर्यटन विस्तारित करावे लागेल. शहराच्या अवतीभोवती किंवा ग्रामीण भागातील पर्यटन व प्रेक्षणीय स्थळांचा विकास केल्यास पर्यटक वाढतील. त्यांचा निवास वाढेल व आर्थिक उलाढाल वाढेल. 

अनेक जण शहरात राहण्याला प्राधान्य देतात. तेव्हा शहरातील गर्दी वाढते, ग्रामीण भागात जाण्यास लोक तयार नसतात. कारण तिथे पाणीपुरवठा, रस्ते, दवाखाने अशा सक्षम पायाभूत सुविधा नाहीत. त्यामुळे किमान प्राधिकरणातील गावांत तरी पायाभूत सुविधा सक्षम केल्यास त्या गावात राहण्याला लोक प्राधान्य देतील. यातून जागांचे प्रश्‍न मार्गी लागतील, ग्रामीण भागात रोजगार व निवासाच्या संधी वाढण्यास मदत होणार आहे.  

रोजगार वाढला तर लोकांकडे पैसे येतील, पैसे आले तर त्यांना घर घेता येईल. आज जागा आहे; पण घर नाही किंवा घर नाही आणि जागाही नाही अशी अनेकांची अडचण आहे. अशा व्यक्तींना घर घेण्यासाठी ‘पंतप्रधान आवास’ योजना आली आहे. याशिवाय, शासनाच्या अन्य घरकुल योजना आहेत. त्यांचा लाभ घेणे शक्‍य होणार आहे. लोकांना हवी असलेली घरे तयार करण्यासाठी आवश्‍यक तंत्रज्ञानासह ‘िक्रडाई’ सज्ज आहे. लोकांनीच रोजगार व सार्वजनिक स्तरावर पायाभूत सुविधा सक्षम करणे आणि त्यासाठी लोकप्रतिनिधींनी ठोस पाठपुरावा करणे अपेक्षित आहे, अशी अपेक्षा ‘िक्रडाई’चे अध्यक्ष महेश यादव यांनी व्यक्त केली.

घर घ्यायचंय.. घर...
‘शहरातील सर्वांना घर’ ही संकल्पना आता केवळ जाहिरातीत नाही, तर प्रत्यक्षात आपल्या शहरात साडेबारा लाख रुपयांना वन बीएचके फ्लॅट उपलब्ध केला आहे. तब्बल ३५ हजार ग्राहकांना याचा लाभ देण्याचा ‘क्रिडाई’चा मानस आहे. त्या दृष्टीने त्यांचे प्रयत्न असून शहरात चार ठिकाणी हा उपक्रम लवकरच सुरू होत आहे. मंजुरी प्रक्रिया पूर्ण झाली असून बॅंकांकडूनही कर्जपुरवठा केला जाणार आहे. तीन ते सहा लाखांपर्यंत ज्यांचे उत्पन्न आहे, अशांना ‘वन’ आणि ‘टू बीएचके’ फ्लॅट सवलतीत उपलब्ध केले जात आहेत. शहरात मध्यवस्तीत हे प्रकल्प होत असून, बुकिंग लवकरच सुरू होणार असल्याची माहिती पदाधिकाऱ्यांनी दिली.