नगर - ‘सर्वांनी आघाडीच्या उमेदवारांना निवडून आणण्यासाठी एकजुटीने काम करावे. महाआघाडीचा धर्म पाळावा,’’ असा कानमंत्र देत संग्राम जगताप यांना निवडून आणण्याचे आवाहन राष्ट्रवादी काँग्रेसचे अध्यक्ष शरद पवार यांनी आज पदाधिकाऱ्यांना केले. 

लोकसभा निवडणुकीच्या पार्श्‍वभूमीवर जिल्ह्यातील रणनीती आखण्यासाठी पवार यांनी पदाधिकाऱ्यांची चार तास प्रदीर्घ बैठक घेतली. या बैठकीत त्यांनी थेट तालुकापातळीवरील पदाधिकाऱ्यांशी हितगुज केले. तालुक्‍यातील प्रश्‍न विचारत एकूण परिस्थितीचा अंदाजही घेतला.

आमदार शिवाजी कर्डिले यांचे पुतणे रोहिदास व देविदास कर्डिले यांनी शरद पवार यांच्या उपस्थितीत ढोल-ताशांच्या गजरात राष्ट्रवादी काँग्रेस पक्षात प्रवेश केला.

अठरा नगरसेवक स्वगृही
महापौर-उपमहापौरपदाच्या निवडणुकीत भारतीय जनता पक्षाच्या उमेदवारांना पाठिंबा दिल्यानंतर पक्षातून हकालपट्टी करण्यात आलेल्या ‘राष्ट्रवादी’च्या १८ नगरसेवकांसह शहर-जिल्हाध्यक्षांवरील कारवाई आज मागे घेण्यात आली. लोकसभा निवडणुकीच्या पार्श्‍वभूमीवर पक्षाध्यक्ष शरद पवार व प्रदेशाध्यक्ष जयंत पाटील यांच्या उपस्थितीत आज त्यांना पुन्हा पक्षात घेण्यात आले.