सोलापूर - उमेदवारीवरून सोलापूर आणि माढा या दोन्ही लोकसभा मतदारसंघांमध्ये काँग्रेस-राष्ट्रवादी आणि भाजपची घालमेल सुरू आहे. माढ्यातून शरद पवार यांनी लढण्याचे जाहीर केल्यानंतर पक्षातील बंडाळी काही काळ थांबली होती. मात्र त्यांनी माघार घेतल्यानंतर आता माढ्यात बंडखोरीची, तर सोलापूर लोकसभा मतदारसंघात काँग्रेसला राष्ट्रवादीची साथ मिळण्याची धास्ती निर्माण झाली आहे.

माढ्याचे खासदार विजयसिंह मोहिते-पाटील यांच्या कुटुंबातील सदस्यास उमेदवारी न मिळाल्यास पुत्र रणजितसिंह भाजपमध्ये प्रवेश करण्याच्या दबावतंत्रावर ठाम आहेत. निवृत्त सनदी अधिकारी प्रभाकर देशमुख यांना उमेदवारी दिल्यास फलटण भागातील नेत्यांनी बंडाचे निशाण फडकाविले आहे.

माढा भागातून आमदार बबनदादा शिंदे, जिल्हा परिषद अध्यक्ष संजय शिंदे व मोहिते-पाटील यांचे विळ्याभोपळ्याचे सख्य सर्वश्रुत आहे. त्यामुळे राष्ट्रवादीसमोर मोठा पेच निर्माण झाला आहे. सोलापूर लोकसभा मतदारसंघात मुख्यमंत्र्यांनी डॉ. जयसिद्धेश्‍वर शिवाचार्य यांना कामाला लागण्याची सूचना केल्यानंतर विद्यमान खासदार ॲड. शरद बनसोडे यांनी त्यांच्या जातीच्या दाखल्यावर प्रश्‍नचिन्ह उभे केले आहे. राज्यसभेचे खासदार अमर साबळे हे परके उमेदवार असल्याचे सांगत आपलीच उमेदवारी फायनल होईल, असा दावा केला आहे. भाजपकडून उमेदवारीसाठी राजेश मुगळे, अर्जुनराव वाघमारे यांचे प्रयत्न आहेत.

शिंदेंपुढे आव्हानांचे डोंगर
खासदार अमर साबळे यांच्या उमेदवारीसाठी सहकारमंत्री गटाकडून दबाव येत आहे. महाराजांना उमेदवारी दिल्यास भाजपची प्रतिमा दलितविरोधी होईल याबाबत दबक्‍या आवाजात चर्चा आहे. काँग्रेसचे सुशीलकुमार शिंदे यांची उमेदवारी ‘फायनल’ असून गेल्या तीन महिन्यांपासून त्यांच्या जनसंपर्क मोहिमेला गती आली आहे. पाकिस्तानविरोधात पंतप्रधान मोदी यांनी घेतलेली कणखर भूमिका, जनमानसातील त्यांचे उंचावलेले स्थान, माढा मतदारसंघातून शरद पवार यांनी घेतलेली माघार यामुळे सुशीलकुमार शिंदे यांच्यासमोर अनेक आव्हाने आहेत.