सांगली : भाजपमधील अनेक नाराज नगरसेवक कॉंग्रेस आघाडीच्या संपर्कात आहेत. महापौर-उपमहापौर पदाच्या निवडणुकीत कॉंग्रेस आघाडी विजयासाठी आवश्‍यक असणारी सदस्यांची "मॅजिक फिगर' निश्‍चित गाठणार असा दावा विरोधी पक्षनेते उत्तम साखळकर, राष्ट्रवादीचे गटनेते मैनुद्दीन बागवान यांनी केला.

कॉंग्रेस-राष्ट्रवादी नगरसेवकांची आज महापौर, उपमहापौर पदाच्या निवडणुकीच्या पार्श्‍वभूमीवर संयुक्त बैठक झाली. यामध्ये कोणत्याही परिस्थितीत महापौर, उपमहापौर पदाची निवडणूक लढवण्याचा निर्णय घेण्यात आला. यावेळी इच्छुकांशी चर्चा झाली. त्यांची नावे आघाडीच्या नेत्यांना कळवण्यात येणार आहेत. नेते जे उमेदवार देतील त्यांच्या पाठीशी रहाण्याचा निर्णयही घेण्यात आला. 

बैठकीस विरोधी पक्षनेते उत्तम साखळकर, राष्ट्रवादीचे गटनेते मैनुद्दीन बागवान, माजी महापौर हारुण शिकलगार, मंगेश चव्हाण, अभिजित भोसले, संतोष पाटील, विष्णु माने, वर्षा निंबाळकर, वहिदा नायकवडी, मनोज सरगर, फिरोज पठाण, संगीता हारगे, रोहिणी पाटील, प्रकाश मुळके, कांचन कांबळे, नर्गिस सय्यद, आरती वळवडे आदी नगरसेवक उपस्थित होते. 

बैठकीनंतर पत्रकारांशी बोलताना विरोधी पक्षनेते साखळकर आणि राष्ट्रवादीचे गटनेते बागवान म्हणाले,""सत्ताधारी भाजपमध्ये मोठी नाराजी आहे. कॉंग्रेस, राष्ट्रवादीमधील अनेकांना मोठी आश्‍वासने देऊन भाजपमध्ये घेतले. भाजपाच्या चिन्हावर निवडून येऊनही पदाची संधी मिळत नाही. विकास कामे होत नाहीत. म्हणून त्यांचा भ्रमनिरास झाला असून ते नाराज आहेत. त्यांनी ही नाराजी उघडपणे आमच्याकडे बोलून दाखवली. आम्ही फोडाफोडीचे राजकारण करणार नाही. पण भाजपमधील नाराज सदस्य आम्हाला मदत करण्यास तयार असतील तर त्याचा फायदा निश्‍चित घेणार.

बहुमताला सहा सदस्य लागणार आहेत. आम्ही मॅजिक फिगर गाठू शकतो. भाजप कोणता उमेदवार देणार त्यावर आमचा उमेदवार निश्‍चित करणार आहे. आमच्यातील काहींनी महापौर-उपमहापौरपदासाठी इच्छा व्यक्त केली आहे, असे साखळकर, बागवान म्हणाले.