मोहोळ (सोलापूर) : गणेशोत्सव व मोहोरम या सणांच्या पार्श्वभूमीवर शहरातून पोलिसांनी शांतता व कायदा सुव्यवस्थेसाठी संचलन केले. या उत्सवाच्या काळात जाणीवपूर्वक कायदा व सुव्यवस्था भंग करणाऱ्याला कायद्याचा चांगलाच बडगा दाखविला जाईल असे ही यावेळी पोलिस निरिक्षक कोकणे यांनी सांगितले.                        

यावर्षी शहरासह तालुक्यात एकूण 88 गणेश मंडळांनी आतापर्यंत नोंदणी केली असून चालू वर्षी तालुक्यात 50 गावात एक गाव एक गणपती संकल्पना राबविली जात आहे. शहरात 25 गणेश मंडळानी गणेशाची स्थापना केली आहे. गणेश उत्सव शांततेत पार पाडण्यासाठी पोलिस निरीक्षक सूर्यंकांत कोकणे यांनी जिल्हा पोलीस अधिक्षक मनोज पाटील, जिल्हा पोलीस उपाधिक्षक चंद्रकांत खांडवी यांच्या मार्गदर्शनाखाली 7 अधिकारी,  70 पोलिस कर्मचारी, 20 होमगार्ड, 150 पोलीस मित्रांची नेमणूक केली आहे.

गणेशोत्सव व मोहरम या सणांच्या पार्श्वभूमीवर सी. आर. पी. सी. 107  सेक्शननुसार 108 लोकावर कार्यवाही, 144 नुसार, 38 जणांवर, 151, 3 नुसार दोघाजणांवर, अशा एकूण 148 जणांवर विविध कलमान्वये प्रतिबंधात्मक कार्यवाही करण्यात आली आहे. तर तडीपारीचे सात प्रस्ताव पाठविण्यात आले आहेत. या संचालनामध्ये पोलिस निरिक्षक सूर्यकांत कोकणे यांच्यासह सहाय्यक पोलीस निरिक्षिक विक्रांत बोधे, अन्वर मुजावर, इंद्रजित सोनकांबळे, अतुल भोसले, नितीन थेटे यांच्यासह सर्व पोलीस, होमगार्ड कर्मचारी उपस्थित होते.