मिरज: मिरज-पुणे या २८० किलोमीटर विद्युतीकरणाचे काम प्रगतिपथावर असलेतरी अद्यापही काही तांत्रिक कामे प्रलंबित असल्यामुळे सध्यातरी कोयना अथवा महालक्ष्मी एक्स्प्रेस विजेवर धावण्याची शक्यता कमी असल्याची माहिती रेल्वे प्रशासनाकडून मिळाली आहे. लोंढा-मिरज-पुणे या मार्गाचे दुहेरी आणि विद्युतीकरणाचे काम मोठ्या वेगाने सुरू आहे. यामध्ये पूर्वीच्या जुन्या एकेरी मार्गाचे विद्युतीकरण पूर्णत्वाकडे आहे. मात्र काही तांत्रिक अडचणीमुळे काही ठिकाणी विद्युतीकरणास विलंब होण्याची शक्यता आहे. यामुळे तुर्तासतरी गाड्या विजेवर धावण्याची शक्यता कमी आहे.

मिरज-पुणे विद्युतीकरण दरम्यान रेल्वे गेटवर ग्रील उभे करणे, विद्युत व्यवस्था, प्लॅंट उभारणीतील कामे पूर्ण झाली आहेत. पुणे विभागाकडून चालकांना विद्युत लोको चालविण्याचे प्रशिक्षण देऊन यंत्रणा सज्ज आहे. नुकतेच महाव्यवस्थापनकांनी दुहेरी आणि विद्युतीकरणाची पहाणी केली आहे; तर काही तांत्रिक कामांसह किरकोळ कामे प्रलंबित असल्याचे निदर्शनास आले आहे. यामुळे सध्या विजेवर कोणतीच गाडी धावणार नसल्याची माहिती रेल्वे प्रशासनाने दिली आहे. कऱ्हाड ते सातारा, पुणे दरम्यान काही ठिकाणी दुहेरीकरण पूर्ण झाले आहे. या मार्गावर दोन्ही मार्गांनी गाड्या धावत आहेत; तर मिरज ते पुणे मार्गावर जुन्या रेल्वे मार्गाचे विद्युतीकरण पूर्ण झाले आहे. पण काही तांत्रिक अडचणीमुळे विजेवर धावणाऱ्या गाड्यांना सध्यातरी रेल्वे प्रशासनाने लाल सिग्नल दिला आहे.

पुणे विभागाच्या वरिष्ठ अधिकाऱ्यांकडून मिरज-पुणे मार्गावरील विद्युतीकरणाची पाहणी केली आहे; पण सध्यातरी एक्स्प्रेस गाड्या विजेवर सोडण्याचे आदेश नाहीत. काही तांत्रिक कामे पूर्ण केल्यानंतर लवकरच गाड्या विजेवर सुरू करण्याचे नियोजन केले जाईल.

- मनोज झंवर, जनसंपर्क अधिकारी, पुणे