नगर  - कोपर्डी बलात्कार व खून खटल्यात विशेष सरकारी वकील ऍड. उज्ज्वल निकम यांच्यासह सहा जणांची साक्ष नोंदविण्याबाबत मुंबई उच्च न्यायालयाच्या औरंगाबाद खंडपीठात अपील करण्यासाठी ऍड. बाळासाहेब खोपडे यांना आणखी पाच दिवसांची मुदत जिल्हा व सत्र न्यायालयाने आज दिली. खंडपीठात दाखल करणार असलेल्या अपिलाच्या स्थितीबाबत शनिवारी (ता. 29) त्यांना म्हणणे मांडण्यास न्यायालयाने बजावले आहे. 

कोपर्डी येथे अल्पवयीन मुलीवरील बलात्कार व खून खटल्याची सुनावणी विशेष जिल्हा न्यायाधीश सुवर्णा केवले यांच्यासमोर सुरू आहे. खटल्याचे कामकाज अंतिम टप्प्यात आले आहे. सुनावणीत आरोपी संतोष भवाळचे वकील ऍड. बाळासाहेब खोपडे यांनी "यशदा'चे माजी अधिकारी रवींद्र चव्हाण, विशेष सरकारी वकील ऍड. उज्ज्वल निकम, डॉ. राजाभाऊ थोरात, पत्रकार डॉ. उदय निरगुडकर, नाशिकच्या न्यायवैद्यक प्रयोगशाळेचे संचालक आणि नगरचे जिल्हाधिकारी यांची साक्ष नोंदविण्याबाबत दिलेला अर्ज न्यायालयाने फेटाळला होता. त्यावर ऍड. खोपडे यांनी मुंबई उच्च न्यायालयाच्या औरंगाबाद खंडपीठात अपील करणार असल्याचे सांगितले होते. त्यासाठी न्यायालयाने अपिलाच्या स्थितीबाबत आजपर्यंत म्हणणे मांडण्यास बजावले होते. खटल्याचे कामकाज आज सकाळी अकरा वाजता सुरू झाले, त्या वेळी ऍड. खोपडे यांनी, "दीड वाजेपर्यंत सांगतो' असे न्यायालयास सांगितले. दीड वाजता ते न्यायालयात म्हणाले, की उच्च न्यायालयात अपिलाची प्रक्रिया पूर्ण झाली नसल्याने मुदत वाढवून मिळावी. 

त्यावर विशेष सरकारी वकील ऍड. उज्ज्वल निकम यांनी आक्षेप घेतला. मात्र, न्यायालयाने पाच दिवसांची मुदत वाढवून दिली. आता 29 जुलै रोजी अपिलाबाबत म्हणणे मांडावे, त्यानंतर खटल्याच्या अंतिम युक्तिवादाची तारीख निश्‍चित केली जाईल, असे न्यायालयाने सांगितले.