मुंबई: राष्ट्रवादी काँग्रेसचे माळशिरस विधानसभा मतदारसंघाचे आमदार हनुमंतराव डोळस यांचे आताड्याच्या कर्करोगाने आज (ता.30) निधन झाले. त्यांच्यावर मुंबईतील सैफी रुग्णालयात उपचार सुरु होते. मात्र आज त्यांची प्राणज्योत मालवली. उद्या सकाळी 10 वाजता माळशिरस इथे त्यांच्यावर अंत्यसंस्कार होणार असल्याची माहिती देण्यात आली आहे.

राष्ट्रवादी काँग्रेसकडून 2014 साली हनुमंत डोळस यांना उमेदवारी देण्यात आली होती. माळशिरस हा मतदारसंघ राखीव असून त्या मतदारसंघातून ते राष्ट्रवादीच्या तिकिटावर विजयी झाले होते. गेल्या अनेक दिवसांपासून त्यांच्यावर मुंबईच्या चर्नी रोड परिसरातील सैफी रुग्णालयात उपचार सुरू होते.

अनुसूचित जातीसाठी आरक्षित असलेल्या माळशिरस मतदारसंघातून आमदार डोळस हे 2009 आणि 2014 मध्ये आमदार झाले होते.