सोलापूर : तुळजापूर वेस येथील लिंगायत स्मशानभूमीत असलेल्या फलकांवर पालकमंत्री तथा आमदार विजयकुमार देशमुख यांचा उल्लेख दिसून आला. ही दोन्ही फलके महापालिका विभागीय कार्यालयाने झाकली नाहीत. या प्रकरणात सोलापूर महानगरपालिका विभागीय कार्यालय क्रमांक दोनच्या अधिकाऱ्यावर आचारसंहिता भंगाचा गुन्हा दाखल करण्यात आला आहे.

भरारी पथकाचे अधिकारी मिलिंद किर्णीकर यांनी जोडभावी पेठ पोलीस ठाण्यात फिर्याद दिली आहे. सोमवारी सायंकाळी पाचच्या सुमारास तुळजापूर वेस येथील लिंगायत स्मशानभूमी परिसरात भरारी पथक गस्तीवर होते. त्यांना स्मशानभूमीच्या आतील बाजूस असलेल्या दोन फलकांवर आमदार विजयकुमार देशमुख यांच्या निधीतून वॉल कंपाऊंड बांधल्याचे तसेच अंतर्गत डांबरी रस्ता केल्याचा उल्लेख दिसून आला. याठिकाणी राजकीय पक्षाच्या उमेदवारांचा प्रचार होत असल्याचे दिसल्याने गुन्हा दाखल करण्यात आला आहे.