कलेढोण - खटाव तालुक्‍यात पुसेगाव, बुध, चितळीबरोबरच देशांतर्गत निर्यातीत प्रसिद्ध असलेल्या भुरकवडीकरांच्या कांद्याला दिवसेंदिवस मागणी वाढत आहे. देशांतर्गत निर्यातीमुळे कांदा काढणी, कापणी, भरणी, वाहतूक अशा पद्धतीने रोजगार करण्याऱ्यांत महिलांची संख्या लक्षणीय आहे.

एरव्ही कांद्यामुळे डोळ्यात पाणी येते. मात्र, खटाव तालुक्‍यातील कांद्याच्या उत्पन्नामुळे मोठी आर्थिक उलाढाल होत आहे. तालुक्‍यात बटाटा उत्पादनात अग्रेसर असणाऱ्या पुसेगाव परिसरात कांद्याचेही चांगले उत्पन्न घेतले जाते. कांद्याच्या दरातील होणाऱ्या चढ-उताराला येथील शेतकरी सामोरे जात पुसेगाव, बुध, डिस्कळ, ललगुण, खटाव, भुरकवडी, चितळी, शेडगेवाडी आदी परिसरात ‘लोणंद’ कांद्याचे मुबलक पीक घेतले जाते. त्यामुळे या परिसरातील विशेषतः महिलांना रोजगार उपलब्ध झाला आहे. दुष्काळी पट्ट्यात उपलब्ध पाण्यावर येथील शेतकरी कांद्याचे पीक घेतो. रोजगाराच्या सुविधा उपलब्ध नसलेल्या या भागात हंगामी रोजगार महिलांना मिळतो. त्यासाठी २०० रुपयांचा रोज त्यांना मिळतो. चालू हंगामात भुरकवडीतील म्हारकीचे माळ नावाच्या शिवारात कांद्या स्वच्छतेचे काम सुरू आहे. या भागात परिसरातील पुसेगाव, वडूज व दहिवडीतील व्यापारी हजेरी लावत कांद्या खरेदी करीत आहेत. त्यानंतर हा कांदा दिल्लीच्या बाजारपेठेत दाखल होतो. त्यास सात ते साडेनऊ रुपये किलो असा भाव मिळाल्याचे भुरकवडीच्या गणपत कदम यांनी सांगितले. एका मालवाहतूक ट्रकमध्ये सुमारे २५ टन कांदा बसतो. आतापर्यंत या भागातून ४०० टन कांदा निर्यात करण्यात आला असून हा हंगाम शेवटच्या टप्प्यात आला आहे.

कांदा काढणी, कापणी, भरणी, वाहतुकीचे काम करण्यासाठी दररोज सुमारे ६० ते ७० महिलांना रोजगार मिळाला आहे. त्यासाठी त्यांना २०० रुपयांची रोजंदारी मिळते.    
- गणपत कदम, भुरकवडी