मोहोळ : मोहोळ येथील रोपवाटिकेचे काम अत्यंत उत्कृष्ट असुन नवीन तंत्रज्ञान वापरून तयार केलेल्या कलमांचा जिल्ह्यातील इतर रोपवाटीकांनाही मोहोळचा आदर्श घ्यावा असे प्रतिपादन राज्याचे कृषी आयुक्त सचिंद्र प्रताप सिंह यांनी केले. 

मोहोळ येथील शासकीय रोपवाटिकेला प्रतापसिह यांनी नुकतीच भेट दिली. त्यावेळी ते मार्गदर्शन करीत होते. त्यांनी रोपवाटीकेतील नारळ, सिताफळ, आंबा, चिकु, डाळींब आदी रोपांची, मातृवृक्षाची तसेच नवीन तंत्रज्ञानानुसार खोगीर बांधणी कलमांची पाहणी करुन समाधान व्यक्त केले. तर कृषी पर्यवेक्षक डी. टी. पवार यांचे त्यांनी कौतुक केले.

चालु वर्षी रोपवाटीकेतुन विविध फळांची मिळुन 52 लाख 25 हजाराची रोपे शेतकऱ्यांना विक्री केल्याचे पर्यवेक्षक पवार यांनी सांगितले. एवढी प्रगती पाहुन आयुक्त प्रतापसिह यांनी चारा टंचाईवर मात करण्यासाठी वैरण विकास कार्यक्रमांतर्गत मका व न्युपीयर या घास चाऱ्याच्या वाणाची लागवड करण्याची सूचना केली.

यावेळी आयुक्त प्रताप सिंह यांच्या समवेत विभागीय कृषी सहसंचालक दिलीप झेंडे, जिल्हा कृषी अधिक्षक बसवराज बिराजदार, आत्माचे प्रकल्प संचालक विजयकुमार बरबडे, उपविभागीय कृषी अधिकारी उमेश बिराजदार, उपविभागीय कृषी अधिकारी तळेकर, तालुका कृषी अधिकारी श्रीधर जोशी, प्रा. दगडु कदम, संग्राम इंगळे, एस. के. पवार, पी. जी. पाटील, संजय काळे यांच्यासह कृषी विज्ञान केंद्राचे अधिकारी उपस्थित होते.