किल्लेमच्छिंद्रगड - शेणखतास पर्यायी खत म्हणून शेतीत वापरल्या जाणाऱ्या मळी मिश्रीत पाण्यामुळे किल्लेमच्छिंद्रगड परिसरातील विहिरींचे पाणी दूषित झाले आहे. त्यामुळे वाडीवस्तीवर राहणाऱ्या नागरिकांना पिण्याच्या पाण्याचे कायमस्वरुपी दुर्भिक्ष तयार झाले आहे. त्यामुळे नागरिकांचे आरोग्य धोक्‍यात आले आहे.

शेणखताची  मागणीपेक्षा उपलब्धता कमी असलेने तसेच शेतीची उत्पादन क्षमता वाढून अधिक उत्पन्न मिळावे यासाठी साखर कारखान्यातून बाहेर पडणारे मळीमिश्रीत पाणी शेतात शेणखतास पर्याय म्हणून शेतकरी वापर करीत आहेत. त्यामुळे जरी या मळीमिश्रीत पाण्यापासुन शेतपिकाच्या उत्पन्नात वाढ होत असली तरी हेच पाणी शेत जमिनीत जिरुन त्याचा पाझर परीसरातील विहीरी, बोअरवेल मध्ये लागुन पिण्यायोग्य असलेले पाणी मळीमिश्रीत झाले आहे.

याच दुषित पाण्याने किल्लेमच्छिंद्रगड, येडेमच्छिंद्र, बिचुद, भवानीनगर, बेरडमाची, नरसिंहपूर, लवणमाची, रेठरेहरणाक्ष या गावातील वाडीवस्तीवर राहाणाऱ्या नागरिकांना पिण्याच्या पाण्याचे कायमस्वरुपी संकट तयार झाले आहे. दूषित आणि मळीमिश्रीत पाण्याचा पशुधनासही पिण्यासाठी उपयोग होत नसलेने एरव्ही शेतात असणारे पशुधन गोठे रिकामे झाले आहेत.