दहिवडी : पावसाने जाहीर प्रचारावर पाणी फेरले असतानाच काल रात्रीपासून सुरु असलेल्या संततधारेमुळे छुप्या प्रचारालाही अडथळा निर्माण झाला आहे. असाच पाऊस मतदानादिवशी राहिला तर काय होणार? या प्रश्नाने उमेदवार चिंताग्रस्त झाले आहेत.

विधानसभा निवडणूकीचा प्रचार शिगेला पोहचला असतानाच पावसाला सुरुवात झाली. या पावसामुळे ठिकठिकाणच्या सभा उधळल्या तर पदयात्रा रोखल्या. तर याच पावसामुळे सातारची शरद पवार यांची सभा संपुर्ण महाराष्ट्रात गाजली. अनेक उमेदवारांना आपले नियोजित कार्यक्रम नाईलाजाने बदलावे लागले. तर कार्यकर्त्यांचाही मोठ्या प्रमाणात हिरमोड झाला.

दरम्यान, शनिवारी (ता. 19 ऑक्टोबर) या प्रचाराच्या शेवटच्या दिवशी सकाळपासूनच पाऊस कोसळायला सुरुवात झाली होती. अधूनमधून विश्रांती घेत दिवसभर पावसाच्या सरी कोसळत होत्या. त्यामुळे सांगता सभांच्या गर्दीवर याचा मोठा परिणाम झाला. अपेक्षित गर्दी जमविताना उमेदवारांना नाकी नऊ आले. महत्प्रयास करुन अपेक्षित गर्दी जमविण्यात अनेकांना अपयश आले. तर काही ठिकाणी उमेदवारांनी भर पावसात सभा घेवून मतदारांना आकर्षित करण्याचा प्रयत्न केला.

शनिवारी सुरु झालेला पाऊस रिमझिम स्वरुपात रात्रभर सुरुच होता. त्यामुळे रात्री योग्य ठिकाणी रसद पोहचविताना कार्यकर्त्यांना अडचण आली. पाण्याने, चिखलाने रस्ते अडविल्याने अनेकांना रात्री सावजांची शिकार करता आली नाही. रात्री सुरु असलेल्या पावसाने आज सकाळपासून मोठा जोर धरला आहे. सकाळपासूनच जोरदार सरी कोसळत आहेत. त्यामुळे यंत्रणा कार्यरत करण्यात उमेदवार व प्रशासन यांच्यापुढे समस्या निर्माण झाली आहे. आज दिवसात यंत्रणेला कशी चालना देणार हा प्रश्न सर्वांना सतावत आहे. 

अशातच उद्या मतदानादिवशीची उमेदवारांना मोठी चिंता भेडसावू लागली आहे. पावसाचा कहर सुरु राहिल्यास मतदारांना मतदान केंद्रापर्यंत पोहचविताना मोठी कसरत होणार आहे. कदाचित याचा परिणाम मतदानाच्या टक्केवारीवर होवून ती घसरु शकते. या घसरलेल्या टक्केवारीचा फटका आपल्याला बसू नये याची काळजी उमेदवारांना घ्यावी लागणार आहे. पावसावर मात करुन हक्काचं मतदान करुन घेण्यासाठी उमेदवारांना आजच कंबर कसावी लागणार यात शंका नाही.