सोलापूर : तस्करीच्या उद्देशाने दुर्मिळ प्रजातीचे चार साप, इगुआना प्रजातीचा सरडा, चार दुर्मिळ प्रजातींचे पक्षी, एक विंचू घेऊन प्रवास करणाऱ्या तरुणाला रेल्वे सुरक्षा बलाच्या पथकाने अटक केली. वन विभागाच्या मदतीने पुढील कारवाई करण्यात येणार असल्याची माहिती विभागीय सुरक्षा आयुक्त जयण्णा कृपाकर यांनी दिली. 

चंद्रभान रंक अमानी (वय 33, रा. भारतीनगर, बारागड, ओडिशा) असे अटक केलेल्या संशयित आरोपीचे नाव आहे. पुणे येथील रेल्वे सुरक्षा बलाच्या नियंत्रण कक्षातून माहिती मिळाल्यानंतर सापळा लावण्यात आला. पुण्याहून ओडिशाकडे जाण्याच्या तयारीत असलेल्या चंद्रभान यास भिगवण रेल्वे स्थानक परिसरात ताब्यात घेण्यात आले. त्याच्याकडे दुर्मिळ प्रजातींचे चार साप, इगुआना प्रजातीचा सरडा, चार दुर्मिळ प्रजातींचे पक्षी, एक विंचू, एक कॅमेरा आणि लॅपटॉप मिळून आले. त्याने उजनी धरणाच्या बॅकवॉटर परिसरातून हे वन्यजीव पकडले असण्याची शक्‍यता आहे. वन्यजीवांची तस्करी करून ते परदेशात पाठविण्यात येत असावेत अशी शक्‍यता रेल्वे सुरक्षा बलाच्या अधिकाऱ्यांनी व्यक्त केली आहे. या प्रकरणाची चौकशी आरपीएफ आणि वन अधिकाऱ्यांमार्फत संयुक्तपणे सुरू आहे. 

दुर्मिळ वन्यजीवांची तस्करी केल्याप्रकरणात चंद्रभान अमानी यास अटक केली आहे. आरोपी हा वन्यजीवांची तस्करी करणाऱ्या टोळीतील सदस्य असण्याची शक्‍यता आहे. हे वन्यजीव परदेशात पाठविण्यात येत असावेत, या अनुषंगाने तपास सुरू आहे. 
- जयण्णा कृपाकर, विभागीय सुरक्षा आयुक्त