मोहोळ : देशाचे पंतप्रधान नरेंद्र मोदी यांच्या 29 तारखेला सोलापूर येथे होणाऱ्या जाहीर सभेसाठी मोहोळ विधानसभा मतदार संघातून सुमारे वीस हजार कार्यकर्ते जाणार असल्याची माहिती मोहोळचे माजी आमदार राजन पाटील व भारतीय जनता पार्टीचे विधानसभा निवडणूक प्रमुख रमेश माने यांनी दिली.

सध्या सोलापूर लोकसभेच्या निवडणुकीत मोठी चुरस निर्माण झाली आहे. माळशिरसचे आमदार राम सातपुते यांच्या विरोधात सोलापूरच्या आमदार प्रणिती शिंदे अशी लढत होत आहे. आमदार सातपुते यांना निवडून आणण्यासाठी महायुतीत सामील असलेले राष्ट्रवादी काँग्रेसचे (उपमुख्यमंत्री अजित पवार गट) माजी आमदार राजन पाटील, आमदार यशवंत माने लोकनेते कारखान्याचे अध्यक्ष विक्रांत पाटील, सिनेट सदस्य अजिंक्यराणा पाटील यांच्यासह भाजपचे जिल्हा उपाध्यक्ष सुशील क्षीरसागर, सतीश काळे, अनुसूचित जाती जमाती मोर्चाचे जिल्हाध्यक्ष ज्ञानेश्वर भोसले यांच्यासह अन्य कार्यकर्ते व पदाधिकारी प्रचारात सक्रिय झाले आहेत.

मुख्यमंत्री शिंदे गटाचे जिल्हाप्रमुख चरणराज चवरे यांनीही पंतप्रधान मोदींच्या सभेसाठी कार्यकर्ते सज्ज केले आहेत. दरम्यान सोलापूरच्या सभेत पंतप्रधान मोदी काय बोलणार याकडे संपूर्ण जिल्ह्याचे लक्ष लागले आहे. लोकसभेचे महायुतीचे उमेदवार राम सातपुते यांच्या प्रचाराच्या दोन फेऱ्या पूर्ण झाल्या आहेत, आमदार सातपुते सध्या होम टु होम प्रचार करीत आहेत.