सोलापूर : केंद्र शासन पुरस्कृत उल्लास नव भारत साक्षरता कार्यक्रमांतर्गत पायाभूत साक्षरता आणि संख्याज्ञान मूल्यमापन चाचणी रविवारी (ता. १७) महाराष्ट्रात ३६ हजार परीक्षा केंद्रावर झाली. यावेळी आजी- आजोबांनी विद्यार्थीदशेचा प्रौढ वयात अनुभव घेत परीक्षेचा आनंद लुटला. सोलापूर जिल्ह्यातील १७ हजार ५७१ जणांचा त्यात सहभाग होता.

उल्लास ॲपवरील नोंदणीपैकी ७४.०३ टक्के असाक्षर व्यक्तींनी परीक्षेला उपस्थिती लावली. मराठीसह हिंदी, इंग्रजी, उर्दू, तमीळ, तेलुगु, कन्नड, गुजराती आणि बंगाली या नऊ माध्यमातून परीक्षा पार पडली.

नव्वदीच्या दशकानंतर मोठ्या प्रमाणात राज्यभर केंद्राचे अभियान राज्याच्या मदतीने वर्षभरापासून राज्यात सुरू आहे. आपली मुले-नातवंडे ज्या शाळेत शिकतात तिथेच परीक्षा देताना नवसाक्षरांच्या चेहऱ्यावर अत्यानंद दिसून येत होता. केंद्रावर ठिकठिकाणी नवसाक्षरांचे स्वागतही झाले.

त्यावेळी नव्वदी पार केलेले वृद्ध आजी-आजोबा अनेक केंद्रावर परीक्षा देताना दिसून आले. परीक्षेत महिलांची उपस्थिती अधिक होती. परीक्षेत उत्तीर्ण झालेल्या नवसाक्षरास साक्षरतेचे प्रमाणपत्र देण्यात येतील.

निकषानुसार गुण प्राप्त न झाल्यास अनुत्तीर्ण ऐवजी ‘सुधारणा आवश्यक’ असा शेरा गुणपत्रकावर देण्यात येईल. आवश्यक असलेल्यांची उजळणी व सराव शिक्षकांनी चालू ठेवायचा आहे. त्यांची येत्या सप्टेंबर किंवा मार्चमध्ये परीक्षा होईल.

नवसाक्षरतेचे हे अभियान २०२७ पर्यंत चालणार आहे, त्यामुळे राज्यातील असाक्षरांनी या मोहिमेत सहभागी व्हावे. आत्ताच्या परीक्षेत ज्यांना बसता आले नाही, त्यांनी येणाऱ्या सप्टेंबर किंवा मार्चच्या परीक्षेस बसता येईल.

- डॉ. महेश पालकर, संचालक, शिक्षण संचालनालय (योजना)