सोलापूर : सोलापूर शहराजवळील बाळे रेल्वे स्थानकाजवळ उद्यान एक्स्प्रेसमधून पडून निंबर्गी (आळंदजवळ) येथील नवविवाहिता अश्विनी लक्ष्मण साळुंखे (वय १९) ही ठार झाली. नागपंचमीचा सण साजरा करून अश्विनी सासरी निघाली होती. बुधवारी (ता. ३०) सकाळी साडेअकराच्या सुमारास हा अपघात झाला आहे.

अश्विनीचा चार महिन्यांपूर्वीच कुर्डुवाडीतील उघाडे कुटुंबातील तरुणाशी विवाह झाला होता. विवाहानंतर आलेल्या पहिल्याच नागपंचमीच्या सणाला ती निंबर्गीला आली होती. सण झाल्यावर अश्विनी आज (बुधवारी) उद्यान एक्स्प्रेसने आई-वडिलांसमवेत सासरी निघाली होती. बाळे रेल्वे स्थानक आल्याने ती चूळ भरण्यासाठी जनरल डब्याच्या दारात उभी होती. चूळ भरताना अचानक तिचा तोल गेला आणि ती रेल्वेतून बाहेर पडली.

तिच्या डोक्याला मधोमध गंभीर दुखापत झाली होती. तिला बेशुद्धावस्थेत दवाखान्यात आणले, पण उपचारापूर्वीच तिचा मृत्यू झाल्याचे डॉक्टरांनी सांगितले. काही क्षणात होत्याचे नव्हते झालेल्या आई-वडिलांनी एकच आक्रोश केला. या अपघाताची नोंद लोहमार्ग पोलिसांत झाली आहे.

चेन पुलिंग करून गाडी थांबविली

रेल्वेच्या जनरल डब्याच्या दरवाजात चूळ भरायला उभारलेली मुलगी तोल जाऊन खाली पडल्यानंतर आई-वडिलांनी आक्रोश केला. लगेचच कोणीतरी चेन पुलिंग करून उद्यान एक्स्प्रेस थांबविली. काहीवेळाने मालगाडी आली, त्यात अश्विनीला सोलापूरला आणले. सिव्हिल हॉस्पिटलला नेले, पण तिचा मृत्यू झाला होता. त्याठिकाणी उत्तरीय तपासणी करण्यात आली.