नातेपुते : आयुष्यातील पहिल्या मतदानाचा हक्क बजावण्यासाठी कोल्हापूर येथून महाराष्ट्र चॅम्पियन पैलवान प्रकाश पांढरे (वय २०) बुधवारी नातेपुतेत दाखल झाला. त्याने नातेपुतेतील मतदारसंघात मतदान केले.

पै. प्रकाशने ‘सकाळ’शी बोलताना सांगितले, की माझे पहिल्यांदाच मतदान असल्याने प्रथमतः मनात भीती होती. परंतु त्यापेक्षा कितीतरी पट आनंदही होता. कारण, एका मतामुळे आपण या सिंहासनावर कोणाला बसवायचे, हे ठरवू शकतो. मी गंगावेस तालमीत मागील चार वर्षांपासून सराव करीत असतानाही आज ठरवून आलो आहे.

मी नॅशनल कुस्ती चॅम्पियन असून, महाराष्ट्र चॅम्पियनशिपही मला मिळाली आहे. आज मतदान केले, मला खूप आनंद होत आहे. यावेळी रघू पांढरे (वय २१) यानेही आपल्या पहिल्याच मतदानाचा हक्क बजावला. तो म्हणाला, मी ही आयुष्यात पहिल्यांदाच मतदान करीत आहे. मी पुणे येथे उच्च शिक्षण घेत आहे. परंतु मतदानासाठी मी पुण्याहून आलो आहे.

#ElectionWithSakal