सांगली : काही दिवसांपूर्वी राज्यपालांनी छत्रपती शिवाजी महाराजांबाबत (Chhatrapati Shivaji Maharaj) केलेल्या वक्तव्यानंतर वाद उफाळला असतानाच, आता सांगली जिल्ह्यात शिवरायांबाबत एक प्रकरण समोर आलंय.

सांगलीतील आष्टा येथील छत्रपती शिवाजी महाराजांचा पुतळ्याचा वाद आता पुन्हा पेटला आहे. आष्टा शहरात मध्यरात्री शिवप्रेमींनी छत्रपती शिवाजी महाराजांच्या पुतळ्याची गनिमी काव्यानं प्रतिष्ठापना केली. दरम्यान, प्रशासनाकडून छत्रपती शिवाजी महाराजांचा पुतळा हठवण्यात येणार असल्याचं समजल्यानं या ठिकाणी रस्तारोको आंदोलन सुरू करण्यात आलं.

भाजपचे निशिकांत पाटील यांच्या नेतृत्वाखाली हे आंदोलन सुरू आहे. मात्र, असं असतानाच आज (बुधवार) रात्री पोलीस (Police) बंदोबस्तात छत्रपती शिवाजी महाराजांचा पुतळा हटवण्यात आला. हा पुतळा हटवल्यामुळं वाद पेटण्याची शक्यता आहे. शिवभक्तांकडून रातोरात बसवण्यात आलेला शिवरायांचा पुतळा प्रशासनाकडून हटवण्याचं काम सुरू करण्यात आलंय.

दरम्यान, पुतळा हटवण्याच्या प्रशासनाच्या निर्णयानंतर रास्ता रोको प्रकरणी तीस आंदोलकांना अटक करण्यात आलीये. पोलीस प्रशासनाविरोधात समस्त शिवप्रेमींनी आज आष्टासह वाळवा तालुका बंदची हाक दिलीये. सध्या परिसरात प्रशासनाकडून 144 कलम लागू करण्यात आलं आहे.