गडहिंग्लज : शहरातील मुख्य रस्त्यावर सम-विषम पार्कींगची अंमलबजावणी सुरू झाली आहे. यामुळे वाहतुकीची कोंडी कमी होत असली तरी नियम करणारे व पाळणाऱ्यांमध्ये वरचेवर वादावादीचे प्रकार घडत आहेत. या वादावादीत सुरूवातीला असणारी "सौजन्या'ची भाषा कालांतराने "इगो'मध्ये रूपांतरीत होत आहे. यामुळे नियमांची पायमल्ली तर होतेच, शिवाय यातून दोन्ही बाजूंचा "इगो हर्ट' झाल्याने सुरळीत सुरू असलेल्या वाहतूक नियोजनात गोंधळ उडण्याचा धोका वाढत आहे. 

अनेक वर्षापासून गडहिंग्लज शहरातील मुख्य मार्गावर वाहतुकीचा बट्ट्याबोळ होता. किती अधिकारी आले आणि गेले. नियोजन कागदावरच राहिले. चार-पाच महिन्यापूर्वी सम-विषम पार्कींग नियोजनाला मूर्तस्वरूप आले. या नियोजनाचे अधिसूचनेत रूपांतर करून पोलिस प्रमुखांनी स्थानिक पोलिस ठाण्याला सम-विषम पार्कींगच्या अंमलबजावच्या लेखी सूचना दिली. त्यानुसार आजरा रोडवरील गिजवणे ओढा ते मार्केट यार्डपर्यंतच्या अंतरात त्याची अंमलबजावणी सुरू झाली. एक वाहतूक पोलिस, टोचन वाहनासह (क्रेन) स्वतंत्र यंत्रणा कार्यान्वित झाली. टोचन वाहन व त्यावरील कर्मचाऱ्यांचा ठेका आहे. या नियोजनामुळे मुख्य रस्त्यावरील वाहतूकीची कोंडी कमी होण्यास मदतच झाली आहे. पार्कींगला शिस्त आली. रस्त्यावरील इतर वाहतुकीला चांगली रूंदीही मिळाली. अशाच स्वरूपाचे नियोजन बाजारपेठेसह इतर वर्दळीच्या रस्त्यांवरही करण्याची मागणी होवू लागली. 

एकीकडे हा सकारात्मक बदल पहायला मिळत असतानाच दुसऱ्या बाजूला मात्र वाहनावरील कारवाईच्या निमित्ताने वादावादीचे प्रकारही वाढत आहेत. मुळात पोलिस यंत्रणेने सुरूवातीला सूचना देवूनच अमलबजावणी सुरू केली आहे. पहिले काही दिवस कारवाईत सूटही देण्यात आली. परंतु, काही वाहनधारकांकडून नियमांची पायमल्ली कमी झालेली दिसत नाही. सम-विषमचे ठिकठिकाणी फलक लावले आहेत. आणखीन काही आवश्‍यक ठिकाणी फलकांची गरज आहे, हे मान्य. दुकानदारसुद्धा पार्कींगची माहिती देणारे फलकही लावत आहेत. तरीसुद्धा चार-पाच महिन्यापासून झालेला हा बदल वाहनधारकांकडून का स्वीकारला जात नाही, हा प्रश्‍न अनुत्तरीत आहे.

आधी नियम मोडायचा आणि नंतर कारवाईची वेळ आली तर कोणाचा तरी वशिला लावायचा. हे जमलेच नाही तर नियम करणाऱ्यांशी हुज्जत घालायचे. यातून वादावादी वाढत जावून त्याचे रूपांतर "इगो'मध्ये होत आहे. नियम करणारा आणि पाळणारा आपापल्या जागेवर ठाम राहतात. सूचना करताना अरेरावीला बगल देवून सौजन्याची भाषा वापरली तर वाहनधारकसुद्धा प्रतिसाद देतात. एखादा वाहनधारक बाहेरून आलेला असला आणि तो या नियोजनाबाबत अज्ञानी असेल तर त्याच्याशी नियम करणाऱ्यांनी सौजन्यपूर्ण भाषा वापरणे गरजेचे ठरते. 

संवादातून समज-गैरसमज दूर व्हावेत 
वशिल्याची झूल पांघरलेल्या नियम पाळणाऱ्यांनी वारंवार नियमांची पायमल्ली करण्यात धन्यता न मानलेले बरेच आहे. अशा प्रकारामुळे लोकांसाठी तयार केलेले वाहतूक नियोजन विस्कळीत होण्यास वेळ लागणार नाही. दोन्ही घटकांनी सौजन्यपूर्ण संवादातून समज-गैरसमज दूर केले तर शिस्तबद्ध वाहतुकीच्या माध्यमातून गडहिंग्लजचे सौंदर्य अधिक खुलेलच, शिवाय दोघांचाही "इगो' दुखावणार नाही, एवढे मात्र निश्‍चित.