गोकुळ शिरगाव, जि. कोल्हापूर - पुणे - बंगळूर राष्ट्रीय महामार्गावर साताऱ्याहून बंगळूरच्या दिशेने गुटखा घेऊन जाणारे दोन ट्रक पोलिसांनी ताब्यात घेतले. यातून सुमारे पावणे दोन कोटींचा गुटखा जप्त केला आहे. याप्रकरणी दोन ट्रक (एमएच 11 ए 5505) व (एमएच 21 एक्‍स 7740) ताब्यात घेत चालक सलमान अमितखान व परवेज अजीज उल्ला खान यांना ताब्यात घेतले आहे. 

गोकुळ शिरगाव पोलिस व अन्न आणि औषध प्रशासन विभागाने ट्रकमधील सुगंधी पान सुपारी व सुगंधी पान तंबाखूचे मोजमाप केले. 120 (रोयॉल 717 सुगंधी तंबाखू कंपनीची 150 पोती), रोयॉल 717 सुगंधी हिरा पान मसाला कंपनीची 290 पोती) असा सुमारे पावणे दोन कोटीचा सुगंधी पान मसाला तंबाखू (मिश्रित) गुटख्याच्या साहित्यासह पोलिसांनी ट्रक चालकांना ताब्यात घेतले आहे.

आचारसंहिता सुरू होताच महामार्ग पोलिसांनी उजळाईवाडी हद्दीत शिताफीने कारवाई करत सुगंधी तंबाखू व पान मसाला पकडला. महामार्गचे सहाय्यक पोलिस निरीक्षक अविनाश पोवार, सहायक फौजदार शंकर कोळी, हवालदार संदीप पाटील, तात्यासाहेब मुंढे, रवींद्र नुल्ले, प्रकाश कदम, शहाजी पाटील, योगेश कारंडे, अभिजित चव्हाण, तौसिफ मुल्ला, आशिष कोळेकर, रामदास मेंटकर आदींनी ही कारवाई केली.