सातारा - पावसाळा सुरू होईपर्यंत शहरातील नागरिकांना पाणीपुरवठा सुरळीत व्हावा, यासाठी पालिकेने शहरातील विविध पेठांमध्ये एक दिवस कपात केली आहे; परंतु दुसरीकडे पाण्याचा होणारा अपव्यय रोखण्याचे आव्हान पाणीपुरवठा विभागापुढे उभे राहिले आहे.

कास धरणाची उंची वाढविण्याचे काम युद्धपातळीवर सुरू आहे. हे काम सुरू असताना शहरातील पाणीपुरवठ्यावर परिणाम होऊ नये, यासाठी उपाययोजना करण्यात आल्या आहेत. यंदा शहराचे तापमान ४२ अंशावर गेलेले आहे.

बाष्पीभवनामुळे कास तलावामधील पाण्याची पातळी आठ फुटांवर पोचली आहे. नगराध्यक्षा माधवी कदम, पाणीपुरवठा समितीचे सभापती श्रीकांत आंबेकर यांनी कास तलावातील पाणी पातळीचा विचार करून शहरातील पाणीपुरवठा पावसाळा सुरू होईपर्यंत सुरळीत ठेण्यासाठी विविध भागांत आठवड्यातून एक दिवस पाणी कपात केली. त्याचे वेळापत्रक करून नागरिकांपर्यंत पोचविले. नागरिकांनीही या निर्णयाचे स्वागत केल्याचे चित्र शहरात आहे. 

दरम्यान, एकीकडे पाणी वाचविण्यासाठी घेतलेल्या निर्णयाचे कौतुक होत असताना दुसरीकडे रस्त्यांवरील जलवाहिनीच्या गळत्या, नळांना तोट्या नसणे, पाणी वाया जाण्याच्या प्रकारांकडे ना पाणीपुरवठा विभागाचे लक्ष आहे ना नागरिकांना त्याचे गांभीर्य.काही भागांत अद्यापही जलवाहिनींच्या गळत्या आहेत. या गळत्या काढल्या जातात; परंतु पुन्हा निर्माण होतात असा तक्रारींचा सूर नागरिकांचा आहे.