पिंपरी - ससून रुग्णालयात कार्यरत असलेल्या डॉक्टरचा मोटारीवरील ताबा सुटल्याने चौघांना उडवले. या अपघातात चौघे जखमी झाले. वल्लभनगर बसस्थानकासमोर सोमवारी (ता. २४) सायंकाळी चारच्या सुमारास अपघात झाला.

पोलिसांनी डॉ. पीयूष प्रशांत टोणपे (वय २२, रा. वल्लभनगर, पिंपरी) यांना ताब्यात घेतले आहे; तर हनुमंत कालिदास नामदास (वय ५०, रा. नेहरूनगर, पिंपरी), रिता अनिल सूर्यवंशी (वय ३०, रा. पिंपळे गुरव, सांगवी), दीपक हरिभाऊ मोतेवार (वय ४०, रा. चिखली), नवनाथ काशिनाथ वाडेकर (वय ४१, रा. खेड, पुणे) अशी जखमी झालेल्यांची नावे आहेत.

डॉ. टोणपे हे ससून रुग्णालयात कार्यरत असून ते पिंपरीतील वल्लभनगर येथे रहायला आहेत. ते सोमवारी सायंकाळी रुग्णालयातून सुटल्यानंतर घरी जात होते. वल्लभनगर बसस्थानकासमोर त्यांचा मोटारीवरील ताबा सुटला. त्यात रस्त्याने जाणारे जखमी झाले. रस्त्याच्या कडेला असलेल्या एका रिक्षालाही कारने धडक दिली. जखमींना रुग्णालयात दाखल करण्यात आले. पिंपरी पोलिस अधिक तपास करत आहेत.

याप्रकरणी डॉ. पियुष यांना ताब्यात घेतले असून त्यांची वैद्यकीय तपासणी केली असता त्यांनी मद्य प्राशन केले नसल्याचे स्पष्ट झाले आहे. जखमींवर उपचार सुरू असून सर्वांची प्रकृती स्थिर आहे. याप्रकरणी गुन्हा दाखल करण्याचे काम सुरू आहे.

- अशोक कडलग, वरिष्ठ पोलिस निरीक्षक, पिंपरी पोलिस ठाणे