भोसरी, ता. १६ ः पीएमपीच्या कात्रज-गुजरवाडी ते भोसरी बसमध्ये बुधवारी (ता. १५) प्रवाशाचा हरवलेला मोबाईल वाहन चालक अशोक बाणा आणि वाहक संजय कांबळे यांनी प्रवाशाला सुपूर्त केला. पीएमपीच्या कात्रज-गुजरवाडी ते भोसरी बस (क्र. एमएच १२ आरएन ४६१९) बुधवारी (ता. १५) भोसरीतील बीआरटीएस टर्मिनलला सकाळी साडेसात वाजता पोहचली.

प्रवासी उतरून गेल्यावर बसचे चालक अशोक बाबूराव बाणा आणि संजय जळबा कांबळे यांना बसमध्ये प्रवाशाचा विसरलेला मोबाईल दिसला. त्यांनी तो मोबाईल बीआरटीएस टर्मिनलचे प्रमुख काळुराम लांडगे, सुरेश बनसोडे, रंगनाथ गिराम यांच्याकडे दिला. काही वेळाने रूपेश प्रकाश चंदरकर या प्रवाशाने मोबाईलवर संपर्क साधून मोबाईल हरविल्याचे सांगितले. त्यांची खात्री पटवून तो मोबाईल त्यांना देण्यात आल्याने चंदरकर यांनी पीएमपीच्या या प्रामाणिकपणाबद्दल आभार मानले.