चिंचवड, ता.२४ ः श्री संत शिरोमणी नामदेव महाराज यांच्या ६७५ व्या संजीवन समाधी सोहळ्यानिमित्त पिंपरी चिंचवड नामदेव शिंपी समाज संस्थेतर्फे चिंचवडगावात टाळ-मृदंगाच्या गजरात नामदेवरायांच्या प्रतिमेची पालखी मिरवणूक काढण्यात आली. मोठ्या श्रद्धेने भाविकांनी पालखीचे दर्शन घेतले.
नामदेवरायांच्या मूर्तीस संस्थेचे पदाधिकारी सपत्नीक एकनाथ सदावर्ते, अनिल पोरे, शाम खर्डे यांच्या हस्ते अभिषेक करण्यात आला. त्यानंतर श्री मोरया गोसावी मंदिरापासून सकाळी दहा वाजल्यापासून पालखी मिरवणुकीला सुरुवात झाली. ठिकठिकाणी पालखीचे स्वागत करण्यात आले. पालखीचे चिंचवडचा राजा गणपती चौकात आगमन आल्यावर मंडळाकडून पुष्पवर्षाव करण्यात आला. चापेकर चौक, नामदेव महाराज चौकात सर्व भक्तांनी फेर धरून उत्साहाने खेळ खेळले. भजनी मंडळाने सामूहिक भजन केले. पालखी मार्गावर ठिकठिकाणी पुष्पवृष्टी, फळांचा नैवेद्य व स्वागत केंद्र उभारण्यात आले होते. मंदिरात पालखीचे आगमन झाल्यानंतर सर्व समाज बांधवांकडून मूर्तीवर पुष्पवृष्टी करण्यात आली. कुणाल क्षीरसागर, तेजस सुकाळे यांच्या हस्ते सपत्नीक सत्यनारायण महापूजा करण्यात आली. संस्थेतर्फे यावर्षी पुरुषोत्तम खर्डे व मोहन मुळे यांना ‘समाजभूषण’ पुरस्काराने सन्मानित करण्यात आले.
CWD25A01675