रावेत, ता.१७ ः सिंधुदुर्ग जिल्हा उत्कर्ष मंडळाच्यावतीने, आकुर्डी प्राधिकरण येथे आयोजित ४७ व्या वार्षिक स्नेहसंमेलनामध्ये मालवणी भाषेचे अभ्यासक आणि लेखक प्रा. बाळकृष्ण लळीत यांना सिंधुदुर्ग भूषण पुरस्काराने गौरविण्यात आले. यानिमित्त मंडळाच्या सभासद आणि त्यांच्या परिवारांनी कोळी गीते, देशभक्तिपर नृत्य आणि विविध वेशभूषेद्वारे सांस्कृतिक कार्यक्रम सादर केले.
ग. दि. माडगुळकर नाट्यगृहात वरील कार्यक्रम झाला. ज्येष्ठ क्रिकेटपटू पांडुरंग साळगांवकर यांच्या हस्ते पुरस्काराचे वितरण करण्यात आले. रोख रक्कम ११ हजार रुपये, मानपत्र असे पुरस्काराचे स्वरुप होते. टाटा मोटर्सचे सरव्यवस्थापक सुशील वारंग, माजी महापौर राजू मिसाळ, माजी नगरसेविका सुजाता पालांडे, सामाजिक कार्यकर्ते नीलेश नेवाळे, उद्योजक प्रमोद राणे, पांचाळमय ब्रह्म सुतार संस्थेचे अध्यक्ष प्रकाश बापार्डेकर, संदीप साळुंखे आदी यावेळी उपस्थित होते.
प्रमुख पाहुण्यांच्या हस्ते गुणवंत विद्यार्थ्यांचा सत्कार करण्यात आला. सांस्कृतिक कार्यक्रमाचे परीक्षक म्हणून धनश्री मेंडजोगी, कोमल शिरभाते यांनी काम पाहिले. लकी ड्रॉ काढून भाग्यवान सभासदांना बक्षीसे देण्यात आली. मंडळाचे अध्यक्ष अजय पाताडे यांनी प्रास्ताविक केले. संतोष साटम, संजय सावंत, भूमिका सावंत आणि क्षितिजा साटलकर यांनी सूत्रसंचालन केले. उत्सव समिती अध्यक्ष पराग पालकर, आनंद साटलकर, संजय सावंत, अनिल सावंत, नंदकिशोर सावंत, बाळकृष्ण गुरव, विश्वास राणे, महादेव बागवे, विजय अहिरे, कोरगावकर, विष्णू भुते, विजय महाडीक यांनी कार्यक्रमासाठी विशेष परिश्रम घेतले.
PNE25V40524