आकुर्डी, ता. २७ : संततधार पावसाने आकुर्डी, निगडीमधील अनेक अंतर्गत रस्ते उखडले असून काही ठिकाणी डांबरीकरणातील खडी रस्त्यावर आली आहे. तसेच पादचारी मार्गही खचले आहेत. एखाद्या कामासाठी खोदकाम केल्यानंतर व्यवस्थित दुरूस्ती न झाल्याने देखील रस्त्यावर खड्डे पडले आहेत. त्यामुळे, अपघाताचा धोका वाढला आहे.
शहर परिसरात सुमारे पाच दिवस झालेल्या पावसामुळे निगडीतील टिळक चौक, आकुर्डी रेल्वे स्थानकाच्या बाजूचा रस्ता, स्पाईन रोड, प्राधिकरणातील रास्ते, आकुर्डी ते भक्ती-शक्ती रस्त्यांची देखील चाळण झाली आहे. या महत्त्वाच्या रस्त्यांवरील खड्ड्यात एखादे वाहन आदळून अपघात होण्याची शक्यता वाढली आहे.

खोदाईनंतर दुरुस्तीच नाही
जलवाहिनी, विद्युत वाहिनी, केबल आदींच्या कामांसाठी बहुसंख्य रस्ते खोदण्यात आले आहेत. मात्र, त्याची व्यवस्थित दुरुस्ती झालेली नाही. गुरुद्वार रोडवरील खोदकाम झाल्यावर तेथील खड्ड्यांसाठी वरवरची मलमपट्टी करण्यात आली. त्यामुळे, त्याच ठिकाणी पावसाने मोठमोठे खड्डे पडले आहेत. त्याने, रस्त्यांच्या दुरवस्थेत भर पडली आहे.

पादचाऱ्यांचीही कसरत
वाहन चालकांबरोबरच पादचारी देखील तारेवरचे कसरत करताना दिसत आहेत. आकुर्डीतील गुरुद्वार परिसरात पादचारी मार्ग पावसामुळे खचला आहे. गुरुद्वार परिसरात सकाळी पाणी साचले होते. या साचलेल्या पाण्यामुळे पादचारी मार्गावरील पेव्हिंग ब्लॉक खराब झाले आहेत.