पिंपरी, ता. ८ : बेशिस्त, सिग्नल न पाळणारे चालक, मेट्रोचे सुरू असलेले काम, खासगी बसची मोठ्या प्रमाणावर रहदारी, चौकातच पडलेले खड्डे यामुळे निगडीतील टिळक चौकात मोठ्या प्रमाणात वाहतूक विस्कळीत झालेली दिसून आली. या चौकाकडून आकुर्डीकडे जाणाऱ्या रस्त्यावर मोठ्या प्रमाणात खड्डे पडल्याने वाहतुकीचा वेग मंदावत आहे.
सायंकाळी सहानंतर खासगी बसची वाहतूक वाढत असल्याने यमुनानगरकडून निगडी चौकात येणाऱ्या रस्त्यावर वाहनांच्या लांबच लांब रांगा लागतात. निगडी चौकातून विविध भागांत जाणाऱ्या पीएमपी बस सुटतात.

प्रमुख कारणे...
- ठिकठिकाणी मेट्रोचे काम सुरू, लावलेले बॅरिकेडस्
- निमुळते रस्ते, खासगी बसची वाढती रहदारी
- निगडी चौकात पडलेले खड्डे, निगडी ते आकुर्डीपर्यंतचा खराब रस्ता

काय करायला हवे ?
- निगडी चौकातील खड्डे त्वरित बुजविणे
- खासगी बसना येथून येण्यास मनाई करणे
- रिक्षा थांबे नवीन ठिकाणी हलविणे

निगडी ते आकुर्डी रस्त्याच्या वळणावर रिक्षा थांबे आहेत. त्याने यमुनानगरकडून येणाऱ्या वाहनांना डाव्या बाजूला वळण्यास अडचण होते. अनेक शाळा, महाविद्यालय व खासगी क्लास आहेत. रहदारी वाढल्याने सायंकाळच्या सुमारास इथून जाणे त्रासदायक होत आहे.
- दिलीप कानगुडे, रहिवासी, यमुनानगर