थेरगाव ः येथील यशवंतराव चव्हाण प्राथमिक शाळेतील ‘सखी मतदान’ केंद्र महिलांच्या दिमतीला सज्ज ठेवले होते. गुलाबी रंगसंगतीच्या रचनेतील मतदान केंद्रांचे संपूर्ण कामकाज महिला अधिकारी व कर्मचारी यांनी सांभाळले. येथे महिला मतदारांचा चांगला प्रतिसाद मिळाला.

लैंगिक समानता आणि मतदार प्रक्रियेत महिलांच्या अधिक रचनात्मक सहभागा संबंधातील महापालिकेच्या यशवंतराव चव्हाण प्राथमिक शाळेतील मतदान केंद्र क्रमांक १९५ ‘सखी मतदान केंद्र’ एकमेव केंद्र तयार केले होते. गुलाबी रंगसंगतीमध्ये सजावट व फुलांची स्वागत कमान उभारली होती. रेड कार्पेट, आकर्षक मॅट, फुग्यांनी खोली सजविण्यात आली. टेबल व खुर्च्यांवर पांढरे व गुलाबी कापड होते. केंद्राच्या प्रवेशद्वारावर रांगोळी, फुलांचे तोरण होते. सेल्फी पॉइट होते. महिला मतदारांचे औक्षण करून गुलाबपुष्प देऊन स्वागत केले. रांगोळीच्या पायघड्यांमुळे इतर केंद्रांपेक्षा सखी केंद्र आकर्षक ठरले. या केंद्राचे दिवसभरात ५५.८० टक्के मतदान झाले. ३२३पैकी १६६ महिला मतदारांनी मतदानाचा हक्क बजावला.

महिला अधिकारी व कर्मचाऱ्यांनी गुलाबी रंगाची साडी परिधान केली होती. जयश्री बागे (केंद्रप्रमुख), अश्‍विनी ढेंबरे, मनीषा चिंचकर, विद्या कराळे (निवडणूक कर्मचारी), जयश्री पवार (शिपाई) आणि माधुरी उगले (पोलिस) यांनी केंद्राची जबाबदारी सांभाळली. निवडणूक निरीक्षक एस. सत्यनारायण यांनी केंद्रास भेट दिली.