पिंपरी, ता.१६ : झोपडपट्टी पुनर्विकास प्राधिकरण (एसआर) सुधारणाअंतर्गत पिंपरीगावातील गणेशनगरमधील २१ मजली ‘एसआरए’ गृहप्रकल्पाच्या लाभार्थ्यांची घराची प्रतीक्षा संपली आहे. रोजंदारीच्या कमाईतून चांगले घर कधी होणार? याचीच चिंता होती. पण, आता सरकारी योजनेमुळे आम्हाला इमारतीमध्ये घर मिळाले आहे. हक्काचे व स्वप्नातील घरं मिळाल्याचा मोठा आनंद आहे, अशी भावना ७० वर्षीय गयाबाई रोकडे यांनी ‘सकाळ’शी बोलताना व्यक्त केली.
पिंपरीगावातील पॉवर हाऊस चौकाजवळ गणेशनगर झोपडपट्टी होती. तेथे ‘एसआरए’ योजनेअंतर्गत झोपडपट्टीचे पुनर्वसन केले आहे. झोपड्यांच्या जागेवर टोलेजंग इमारत उभी केली आहे. तीन वर्षांपासून लाभार्थ्‍यी चाव्यांच्या प्रतीक्षेत होते. त्यांना ४२० चौरस फुटांचे घर, लिफ्ट, सोलर पॅनेल अशा सुविधा मिळाल्‍या आहेत. नुकताच चावी वाटपाचा कार्यक्रम झाला. मोठ्या संख्‍येने गणेशनगर ‘एसआरए’ पुनर्वसनधारकांनी गर्दी केली होती. सकाळपासूनच लाभार्थी चावी घेण्यासाठी उपस्थित होते. लाभार्थ्यांचे नाव जाहीर करताच त्यांचा आनंद वाखाणण्याजोगा होता. कुठल्या मजल्या घर मिळाले आहे ? याची उत्सुकता लाभार्थ्यांमध्ये पहायला मिळाली. झोपडपट्टीधारकांना पक्‍क्या सदनिकांचे वाटप करण्यात आल्याने घराचे स्वप्न पूर्ण झाल्याचे प्रतिक्रिया लाभार्थ्यांनी व्यक्त केल्या आहेत.

‘‘गेल्या तीस-चाळीस वर्षांपासून झोपडपट्टीमध्ये राहतोय. तीन वर्षांनंतर हातात घराच्या चाव्या मिळाल्‍या आहेत. गोरगरीब झोपडपट्टीधारकांना स्वतःची पक्की घरे मिळाली. अगदी सुविधायुक्त अशी सदनिका आहे. बांधकाम चांगले आहे.’’
- अनिता वाघमारे, लाभार्थी

‘‘झोपडपट्टी पुनर्विकास प्राधिकरणाकडून झोपडपट्टीधारकांना ४२० चौरस फुटांचे घर मिळाले आहे. अतिशय चांगला प्रकल्प तयार झालेला आहे. रहिवाशांना हक्काचे घर मिळाले आहे.’’
- सुरेश लोंढे, विकासक, गणेशनगर एसआरए प्रकल्प