पिंपरी, ता. ५ ः ‘नागरी आरोग्य पोषण दिनानिमित्त पिंपरी चिंचवड महापालिका वैद्यकीय विभाग व तालेरा रुग्णालय झोन यांच्या संयुक्त विद्यमाने एक दिवसीय मोफत आरोग्य तपासणी व उपचार शिबिराचे आयोजन करण्यात आले होते. रावेत येथील तीर्थस्वरूप ज्येष्ठ नागरिक संघ येथे सोमवारी (ता. ४) सकाळी १० ते सायंकाळी पाच वाजेपर्यंत सुरू असलेल्या या शिबिरात तीनशेहून अधिक नागरिकांनी विविध तपासण्या व उपचारांचा लाभ घेतला.
या शिबिरात वजन, उंची, बीएमआय, रक्तदाब, सीबीसी, पीबीएस, बीएसएल-आर यासह विविध रक्त तपासण्या, गर्भवतींची तपासणी, छातीचा एक्स-रे, थुंकी तपासणी आणि नियमित लसीकरणाची सुविधा देण्यात आली. याशिवाय बालरोग, स्त्रीरोग, नेत्ररोग, दंतरोग व ईएनटी तज्ज्ञांकडून तपासणी करण्यात आली. आभा व आयुष्यमान भारत कार्ड नोंदणी आणि आवश्यक औषधांचे मोफत वितरणही करण्यात आले. शिबिराचे उद्‍घाटन आरोग्य वैद्यकीय अधिकारी डॉ. लक्ष्मण गोफणे यांच्या हस्ते करण्यात आले. अतिरिक्त आरोग्य वैद्यकीय अधिकारी डॉ. अभय दादेवार, डॉ. अंजली ढोणे, तीर्थस्वरूप ज्येष्ठ नागरिक संघाचे शिरीष कुंभार, तालेरा रुग्णालय प्रमुख डॉ. संजय सोनेकर, नोडल अधिकारी डॉ. नंदकुमार मोरे व प्रियांका सर्वज्ञ उपस्थित होते.
वैद्यकीय विभागाकडून यापुढील काळात नागरी आरोग्य पोषणदिन नवीन आकुर्डी रुग्णालय, यशवंतराव चव्हाण स्मृती रुग्णालय, नवीन भोसरी रुग्णालय, यमुनानगर रुग्णालय, नवीन जिजामाता रुग्णालय, सांगवी रुग्णालय आणि नवीन थेरगाव रुग्णालय येथेही मोफत आरोग्य शिबिर आयोजित करण्यात येणार आहेत. नागरिकांमध्ये वेळेवर निदान आणि प्रतिबंधात्मक उपायांची सवय रुजविण्यासाठी आयोजित करण्यात येत असून नागरिकांनी याचा लाभ घ्यावा, असे डॉ. लक्ष्मण गोफणे यांनी सांगितले.