पिंपरी, ता. ५ ः पुणे - नाशिक महामार्गावर दुभाजकावर बसविलेले ‘सेफ्टी लाईट बॅरिअर’ तुटले आहेत. त्यामुळे रात्रीच्यावेळी समोरुन येणाऱ्या वाहनांच्या दिव्यांचा प्रकाश थेट चालकांच्या डोळ्यांवर पडत आहे. परिणामी, वाहनांच्या अपघाताचा धोका निर्माण झाला आहे. प्रशासनाने तत्काळ महामार्गावरील दुभाजक आणि ‘बॅरिअर’ची दुरुस्ती करावी, अशी मागणी नागरिकांनी केली आहे.
पुणे आणि नाशिक या दोन प्रमुख शहरांना महामार्ग क्रमांक - ६० जोडतो. उत्तर महाराष्ट्रातून येणारी वाहने चाकण मार्गे मुंबई, अहिल्यानगर आणि छत्रपती संभाजीनगरला जाण्यासाठी याच महामार्गाचा वापर करतात. पुणे जिल्ह्यात तळेगाव, चाकण आणि रांजणगाव एमआयडीसी असल्यामुळे या महामार्गावर अवजड वाहनांची मोठ्या प्रमाणावर वर्दळ असते. पुणे आणि मुंबई कृषी उत्पन्न बाजार समितीत शेतीमाल घेऊन जाणाऱ्या वाहनांची वर्दळ असते; पण, गेल्या काही वर्षांत या महामार्गाची प्रचंड दुरवस्था झाली आहे.

काय आहेत समस्या ?
- नाशिक फाटा ते राजगुरुनगरपर्यंत महामार्गाचे दुभाजक तुटलेले
- दुचाकीचालक मधूनच रस्ता ओलांडतात
- दोन्ही बाजूला रिफ्लेक्टर लावण्यात आलेले नाहीत
- मध्यभागी असलेल्या दुभाजकावरील ‘सेफ्टी लाईट बॅरिअर’ तुटले
- रात्रीच्यावेळेस वाहने दुभाजकावर जाऊन अपघातग्रस्त होण्याचे प्रकार
- भोसरी उड्डाणपुलाजवळील लोखंडी जाळ्या तुटल्याने पादचारी मधूनच रस्ता ओलांडत आहेत

पुणे - नाशिक महामार्गावर दिवसभर प्रचंड वाहतूक कोंडी असते. रात्री कुठेतरी महामार्ग मोकळा असतो; पण यावेळीही दुभाजकाची उंची कमी असल्यामुळे पादचारी सहज रस्ता ओलांडतात. पूर्वी रस्त्याच्या मधोमध ‘लाईट बॅरिअर’ बसविलेले होते. पण, ते ही आता तुटलेले आहेत. त्यामुळे समोरुन येणाऱ्या वाहनांच्या दिव्यांचा प्रकाश डोळ्यांवर पडतो. प्रशासनाने यावर काहीतरी उपाययोजना कराव्यात.
- धनाजी गाडे, वाहनचालक

पुणे - नाशिक महामार्गावर लावलेले ‘सेफ्टी लाईट बॅरिअर’ तुटले आहेत. नागरिक, महिला व शालेय विद्यार्थी धोकादायक पद्धतीने रस्ता ओलांडत आहेत. त्यामुळे गंभीर अपघात होण्याची शक्यता वाढली आहे. प्रशासनाने तत्काळ नवीन ‘सेफ्टी लाईट बॅरिअर’ बसवावेत अथवा सध्याचे बॅरिअर दुरुस्त करावेत.
- निर्गुण थोरे, नागरिक, चऱ्होली