पिंपरी, ता. २२ : गणेशोत्सव अवघ्या सहा दिवसांवर आल्याने शहरातील विविध राजकीय पक्षांतील इच्छुक, आजी-माजी नगरसेवक आणि आमदारांनी गावाकडे जाणाऱ्यांसाठी एसटी बस मोफत आरक्षित करण्याचा धडाकाच लावला आहे. काही इच्छुकांनी खासगी बसही आरक्षित केल्या आहेत. यानिमित्ताने इच्छुकांची निवडणुकीसाठी जोरदार तयारी सुरू असल्याची चर्चा होत आहे. नागरिकही ही संधी साधण्यासाठी नाव नोंदणी करीत आहेत.
काही महिन्यांतच स्थानिक स्वराज्य संस्थांच्या निवडणुका होणार आहेत. यासाठी सर्वच राजकीय पक्षांकडून जोरदार तयारी सुरू आहे. मतदारराजाला आकर्षित करण्यासाठी विविध योजनांचा वर्षाव केला जात आहे. गणेशोत्सव विशेष महत्त्व सण असल्यामुळे मतदारांना आकर्षित करण्याच्या उद्देशाने अनेक इच्छुक प्रयत्नशील आहेत.
गणेशोत्सवासाठी नागरिकांची गावाकडे जाण्यासाठी लगबग सुरू आहे. बहुतेक रेल्वे गाड्यांचे आरक्षण उपलब्ध नसल्याने अनेकांची गैरसोय होत आहे. यामुळे सर्वच पक्षांतील इच्छुकांनी मोर्चेबांधणी सुरु केल्याचे दिसते.
---