पिंपरी, ता. २५ : काळेवाडी येथील शर्विका म्हात्रे हिने कमी वयात अवघड लिंगाण्यासह १४० गडांवर भगवा फडकविला आहे. या गडांवरील पवित्र मातीचा संग्रह तिने आपल्या घरात केला आहे. गडकोटांवरची कन्या म्हणून शर्विका हिने ओळख मिळवली असून तिने आतापर्यंत शंभरहून अधिक पुरस्कार प्राप्त केले आहेत.
शर्विका ही मूळची अलिबागची. परंतु, सध्या ती काळेवाडीमध्ये राहते. राज्यातील सर्वात उंच शिखर तिने अवघ्या साडेतीन वर्षांत सर केले आहे. शर्विका सध्या सात वर्षांची आहे. तिने या गडकिल्ल्यांवरील मातीचा संग्रह केला आहे.
प्रत्येक गडावरून खाली आल्यावर त्या गडाचा इतिहास जेव्हा ही सांगते; तेव्हा शिवरायांचा पराक्रमाचे प्रसंग डोळ्यांसमोर उभे ठाकतात. या मातीत आपल्या मावळ्यांचे रक्त सांडले आहे, असे ती नेहमी म्हणते. मला प्रत्येक गडांवर शिवराय दिसतात, असे ती सांगत असते. पुण्यात वॉल क्लाइंबिंगचे ती प्रशिक्षण घेत आहे. तिला रायगड भूषण पुरस्काराने गौरविण्यात आले आहे. तिच्या कर्तृत्वाने अखंड महाराष्ट्राला भुरळ पडली आहे. सोशल मीडियावर तिचे ७४ हजार फॉलोअर्स आहेत. तिच्या नावावर तीन वेळा इंडिया बुक, आशिया बुक ऑफ रेकॉर्ड, दोन वेळा वर्ल्ड बुक ऑफ रेकॉर्ड, लंडन व ओएमजी व डायमंड बुक ऑफ रेकॉर्ड पटकाविण्याचा मान आहे. राज्यातील सर्व दुर्ग सर करून इतिहासाच्यादृष्टीने गडकोटांचा अभ्यास आणि त्यांच्या संवर्धनाकडे लक्ष देण्याचा तिचा मानस आहे.
ssociated Media Ids : PNE25V16462