पिंपरी, ता. १४ : राज्य मार्ग परिवहन (एसटी) महामंडळातर्फे १६ जूनपासून ‘एसटी पास थेट तुमच्या शाळेत’ ही विशेष मोहीम राबविण्यात येणार आहे. याअंतर्गत शाळा-महाविद्यालयांतील विद्यार्थ्यांना बसचा पास त्यांच्या शिक्षण संस्थेतच दिला जाणार आहे. यामुळे विद्यार्थ्यांना पाससाठी आता रांगेत ताटकळत उभे राहावे लागणार नाही.
यंदाचे शैक्षणिक वर्ष २०२५-२६ सोमवारपासून (ता.१६) सुरू होणार आहे. शालेय विद्यार्थ्यांसाठी एसटी महामंडळाकडून ६६ टक्के सवलत दिली जात आहे. केवळ ३४ टक्के रक्कम भरून विद्यार्थ्यांना मासिक पास काढता येतो. त्याचप्रमाणे शासनाच्या पुण्यश्लोक अहिल्याबाई होळकर योजनेअंतर्गत बारावीपर्यंत शिक्षण घेणाऱ्या सर्व विद्यार्थिनींना मोफत एसटी पासचे वितरण केले जाते. यासाठी विद्यार्थ्यांना एसटीच्या पास केंद्रावर जाऊन रांगेत उभे राहून पास घ्यावे लागत होते किंवा गटागटाने आगारात जाऊन आगार व्यवस्थापनाकडून पास घेतले जात असत. पण, मागच्या वर्षीपासून विद्यार्थ्यांना शाळेतच पास देण्याची सुविधा उपलब्ध करुन दिली होती. यंदाही ही मोहीम राबवली जाणार आहे.
तत्पूर्वी, सर्व शाळा महाविद्यालयाच्या मुख्याध्यापक व प्राचार्य यांना एसटीच्या आगार व्यवस्थापकांनी पत्र देऊन आपल्या शाळेत नवीन वर्षात शिकणाऱ्या विद्यार्थी विद्यार्थ्यांची यादी देण्यास सांगितले आहे.

विद्यार्थ्यांना आता एसटी बसचे पास थेट त्यांच्या शाळेत वितरित करण्यात येणार आहे. शाळेत जाऊन विद्यार्थ्यांची नोंद घेऊन सोमवारपासून हे पास वितरीत करण्याच्या सूचना सर्व आगार प्रमुखांना आणि स्थानक प्रमुखांना दिल्या आहेत.
- अरुण सिया, विभाग नियंत्रक, पुणे विभाग