पिंपरी, ता. १७ ः संत तुकोबांचे अभंग तारणाऱ्या इंद्रायणीच्या साक्षीने कवी सुरेश कंक लिखित ‘कृष्णार्पण’ या कवितासंग्रहाचे प्रकाशन झाले. गाथामंदिराजवळ आनंद डोह येथे झालेल्या या सोहळ्याला प्रा. डॉ. बाळासाहेब लबडे, राजेंद्र घावटे, प्रदीप गांधलीकर, नारायण कुंभार उपस्थित होते. सुहास घुमरे, राधाबाई वाघमारे, हेमंत जोशी, मेहमुदा शेख, आनंद मुळूक, कल्पना बंब यांनी आध्यात्मिक विषयांवरील कवितांचे प्रभावी सादरीकरण केले. श्यामला पंडित यांनी स्वागत केले.
‘वडिलांनी दिलेल्या रोजनिशीत मी कविता स्फुरली की लिहून ठेवीत असे. यथावकाश रोजनिशी जीर्ण झाली; परंतु आजतागायत त्यातून जीवनाच्या वेगवेगळ्या टप्प्यांवर तीन कवितासंग्रहांची निर्मिती झाली आहे,’ असे मनोगत कवी सुरेश कंक यांनी व्यक्त केले. याप्रसंगी सर्व उपस्थितांना सहभागी करून घेत इंद्रायणी नदीच्या जलाशयातील नावेत तसेच आनंद डोहाच्या काठावर कवितासंग्रहाचे प्रकाशन करण्यात आले. त्यामध्ये संत तुकाराममहाराजांच्या वेशभूषेतील प्रकाश घोरपडे, कैलास भैरट, पांडुरंग सुतार, उमेंद्र बिसेन, बळिराम शेवते, विवेक कुलकर्णी, अर्जुन चौधरी, सुनीता घोडके, अरुण घोडके, गजानन टाक, राधाकिसन दराडे, श्रीकांत दराडे, ऋतुजा दराडे, भाऊसाहेब गायकवाड, प्रकाश रसाळ, मच्छिंद्र जुरांगे यांना सहभागी करून घेण्यात आले. कार्यक्रमाच्या संयोजनात अशोकमहाराज गोरे, मुरलीधर दळवी, अरुण परदेशी, जयश्री गुमास्ते, शरद काणेकर, श्यामराव सरकाळे, फुलवती जगताप यांनी परीश्रम घेतले. सुभाष चव्हाण यांनी सूत्रसंचालन केले. तानाजी एकोंडे यांनी आभार मानले.