पिंपरी, ता. १८ : पिंपरी-चिंचवड शहरात पावसाळ्यात वाढणाऱ्या सार्थीच्‍या आजारांना आळा घालण्यासाठी महापालिका सज्‍ज झाली आहे. डेंगी बीट मोहिमेअतर्गंत सर्वेक्षण करून नागरिकांमध्ये जनजागृती देखील केली जाणार आहे. महापालिकेच्या वैद्यकीय व आरोग्य विभागाकडून खबरदारी घेतली जाणार आहे. डेंगी, चिकनगुनिया आणि मलेरियासारखे आजार रोखण्यासाठी उपाययोजना केल्या जात आहे.
ज्या भागात डेंगीचे रुग्ण जास्त आढळतात, त्याठिकाणी धूर फवारणी करण्यात येणार आहे. कंटेनर सर्व्हेअंतर्गत डासांची उत्पत्ती स्थानके शोधून नष्ट करण्यात येणार आहे. दरम्यान, जून महिन्याच्या सुरूवातीलाच शहरामध्ये डेंगीचे २० संशयित रुग्ण आढळले आहेत. तसेच तीव्र थंडीताप असलेल्या रुग्णांची संख्या दहा दिवसांमध्ये सहा हजार ८९० रुग्ण आढळले आहेत. याशिवाय चिकनगुनियाचे चार संशयित रुग्ण आढळले आहेत. पावसाचे पाणी साचून त्यामध्ये डासांची उत्पत्ती होते. त्यामुळे पावसाळ्याच्या दिवसांमध्ये साथीच्या आजारांमध्ये वाढ होते. डेंगी, मलेरिया व चिकुनगुनिया हे आजार पावसाळ्याच्या दिवसांमध्ये जास्त वाढतात. महापालिकेच्या वैद्यकीय विभागाने गेल्यावर्षी शहरामध्ये ज्या भागात जास्त डेंगीचे रुग्ण आढळले होते. त्या भागांची नोंद करून त्या भागांमध्ये डेंगी बीट ही मोहीम राबविली होती. यावर्षी देखील पुन्हा डेंगी बीट मोहीम राबवण्यात येणार आहे.

ही काळजी घ्या
- पावसाळ्यात परिसर स्वच्छ ठेवा
- आठवड्यातून एक दिवस कोरडा पाळा
- घरातील सर्व भांडी रिकामी करून ठेवा
- परिसरात साचलेल्‍या पाण्याचा निचरा करा
- घरामध्ये कुंड्या, छतावरील भंगार साहित्यामध्ये पाणी साचू देऊ नये
- थंडी ताप अशी लक्षणे आढळल्यास नजीकच्या दवाखान्यात तपासणी करून घ्या

पावसाळ्याच्या दिवसांमध्ये डेंगी, मलेरिया या रुग्णांची संख्या वाढते. जनजागृती, तसेच प्रतिबंधात्मक उपाय करण्यात येणार आहे. महापालिकेच्या आरोग्य व वैद्यकीय दोन्ही विभागांकडून खबरदारी घेण्यात येत आहेत. स्वच्छतेबरोबर औषधोपचार, लसीकरणावर भर दिलेला आहे. नागरिकांनी देखील काळजी घ्यावी.
- विजयकुमार खोराटे, अतिरिक्त आयुक्त, पिंपरी-चिंचवड महापालिका