पिंपरी, ता. १९ ः पंढरीसी जावे ऐसे माझे मनी । विठाई जननी भेटे केव्हा ।।
न लगे त्याविण सुखाचा सोहळा । लागे मज ज्वाळा अग्निचिया ।।
तुका म्हणे त्याचे पाहिलिया पाय । मग दुःख जाय सर्व माझे ।

संत तुकाराम महाराजांच्या अभंगातील ओवी प्रमाणेच कोसळणाऱ्या पावसाची तमा न बाळगता पंढरीच्या विठू माऊलीच्या दर्शनासाठी आतुर झालेला वैष्णवांचा मेळा गुरुवारी (ता. १९) पिंपरी चिंचवडमध्ये दाखल झाला. सकाळपासून पडणारा पाऊस, मात्र तरीही पंढरीच्या दिशेने वेगाने पडणारी पावले, हाती भगवी पताका, अंगावर रेनकोट, मुखात माऊली तुकोबांचा जयघोष, ऐन पावसातही शिस्तीत चालणाऱ्या दिंड्या अशा वातावरणामुळे अवघी उद्योगनगरी तुकोबामय झालेली होती. या पालखी सोहळ्यासोबत आलेल्या वारकऱ्यांचे उद्योगनगरीत मोठ्या उत्साहात स्वागत करण्यात आले. पालखी सोहळ्याच्या स्वागतासाठी भक्ती शक्ती चौकापासून ते आकुर्डीपर्यंत विविध ठिकाणी स्वागतकक्ष उभारण्यात आले होते. या ठिकाणी पिंपरी चिंचवड महापालिकेच्या वतीने पालखीचे स्वागत करण्यात आले. सायंकाळी पालखीचे स्वागत करण्यासाठी भक्ती शक्ती चौकात मोठा जनसागर लोटला होता. पारंपारिक वेशभूषा केलेल्या महिला व वारकऱ्यांच्या वेशात आलेले चिमुकले, कपाळी केशरी गंध रेखाटलेली तरुणाई असे चित्र यावेळी भक्ती शक्ती चौकात दिसून आले. त्यानंतर तुकोबांची पालखी आकुर्डीतील विठ्ठल रुक्मिणी मंदिरात मुक्कामासाठी विसावली. शुक्रवारी (ता.२०) पहाटे साडेपाच वाजता पालखी पुण्याकडे मार्गस्थ होईल.
पालखी सोहळा जरी सायंकाळी शहरात पोचणार असला तरी विविध दिंड्या दुपारी एक वाजल्यापासूनच शहरात यायला सुरवात झाली. शहरात सकाळपासूनच पावसाने जोरदार हजेरी लावली होती. मात्र, या पावसातही शहरातील विविध संस्था, संघटना व सामान्य नागरिकांचा सेवाभाव कमी झालेला दिसला नाही. आकुर्डीतील विठ्ठल रुक्मिणी मंदिराचा परिसर सकाळपासूनच गर्दीने फुलून गेला होता. मंदिराला करण्यात आलेली फुलांची सजावट, सकाळपासून सुरू असणारे भजन, कीर्तन यांसारखे धार्मिक कार्यक्रम आणि शहरात दाखल होणाऱ्या दिंड्या यामुळे वातावरणात उत्साह दिसून येत होता.