पिंपरी, ता. १० : पोलिसांनी तीन घरफोड्यांना बुधवारी अटक केली. आरोपींनी दिघी, चाकण, काळेवाडी व सांगवी या पोलिस ठाण्यांच्या हद्दीत सोमवारी एकाच दिवशी झालेल्या घरफोड्यांची कबुली दिली. त्यांच्याकडून सुमारे १२ लाख रुपयांचे दागिने जप्त करण्यात आले. गुन्हे शाखेच्या युनिट तीनने ही कारवाई केली. मोसीन शौकतअली शेख (वय ३२), उदयवीर मलखानसिंग सहासी (वय ३६) व विनयकुमार गंगासरन (वय ३४ सर्व रा. उत्तर प्रदेश) अशी आरोपींची नावे आहेत. टेम्पोमध्ये दुचाकी टाकून परराज्यात पळून जाण्याचा त्यांचा डाव होता. त्यांच्या बॅगेमधून दागिने व रोख रक्कम असा एकूण १२ लाख १३ हजार ५९८ रुपयांचा ऐवज जप्त करण्यात आला. याशिवाय एकूण १३ लाख रुपये किमतीचा टेम्पो आणि दुचाकीही पोलिसांनी जप्त केली. याप्रकरणी पोलिस उपनिरिक्षक सुनील जावळे अधिक तपास करीत आहेत.
...