पिंपरी : रस्त्यामध्ये बुलडोजरच्या साहाय्याने काम करत असलेल्या व्यक्तीला आणि त्याच्या मुलाला चौघांनी बेदम मारहाण केल्याप्रकरणी चौघांवर गुन्हा दाखल आला आहे. ही घटना चऱ्होली बुद्रूक येथे घडली. याप्रकरणी पंढरीनाथ रामचंद्र खेडकर (रा. दाभाडे सरकार चौक, चऱ्होली) यांनी दिघी पोलिस ठाण्यात फिर्याद दिली आहे. त्यानुसार अभिषेक तापकीर, नीलेश काळजे, शाम काटे, अक्षय तापकीर (सर्व रा. काळजेवाडी रोड, काटे वस्ती, चऱ्होली बुद्रूक) यांच्यावर गुन्हा दाखल झाला आहे. फिर्यादी खेडकर हे बुलडोजरच्या साहाय्याने रस्त्याचे काम करत असताना आरोपी तेथे आले. त्यांनी जोरात हॉर्न वाजवून ‘आम्ही याच रस्त्यावरून जाणार, पहिला मार विसरला का’ असे म्हणत खेडकर यांना शिवीगाळ आणि दमदाटी करीत त्यांना बेदम मारहाण केली. आरोपी अक्षय तापकीर याने फिर्यादी यांना दगडाने मारहाण केली. दरम्यान, भांडण सोडविण्यासाठी खेडकर यांचा मुलगा आला असता त्यालाही आरोपींनी मारहाण करून जखमी केले.

घरकाम करणाऱ्या महिलेने चोरले साठ हजारांचे दागिने
पिंपरी : घरकाम करणाऱ्या महिलेने घरातून साठ हजार रुपये किमतीचे सोन्याचे दागिने चोरले. ही घटना आकुर्डी येथील ऐश्वर्यम वेंचर्स येथे घडली. याप्रकरणी अंकित कुमार (रा. ऐश्वर्यम वेंचर्स, अडवाणी ऑर्लीकोन, आकुर्डी) यांनी याप्रकरणी पिंपरी पोलिस ठाण्यात फिर्याद दिली आहे. त्यानुसार पोलिसांनी ३५ वर्षीय महिलेला अटक केली आहे. आरोपी महिला ही फिर्यादी अंकित कुमार यांच्या घरी घरकाम करत होती. दरम्यान, तिने फिर्यादी यांच्या घरातून दहा ग्रॅम वजनाचे साठ हजार रुपये किमतीचे मंगळसूत्र चोरून नेले. पोलिसांनी महिलेला अटक केली आहे.

बांधकाम साइटवरून बांधकाम साहित्याची चोरी
पिंपरी : बांधकाम साइटवरून सव्वा दोन लाख रुपये किमतीचे बांधकाम साहित्य चोरल्याप्रकरणी पोलिसांनी चौघांना अटक केली आहे. ही घटना डुडुळगाव येथे घडली. किरण महादेव गिरी (वय ३८, लक्ष्मीनगर, मोशी), संदीप शिवाजी काळजे (वय ३४, रा. इंद्रायणीनगर, आळंदी), दीपक टेक राणा (वय ३३, रा. आळंदी), जान मोहम्मद रेफाकत अली सिद्दिकी (वय ४०, रा. कुदळवाडी, चिखली) अशी अटक केलेल्या आरोपींची नावे आहेत. याप्रकरणी संदीप भानुदास गावडे (रा. शिवाजीवाडी, मोशी) यांनी दिघी पोलिस ठाण्यात फिर्याद दिली आहे. डुडुळगाव केळगाव येथे एक बांधकाम साइट सुरू आहे. तिथे फिर्यादी यांनी बांधकाम साहित्य ठेवले आहे. तेथून दोन लाख २० हजार रुपये किमतीचे बांधकाम साहित्य आरोपींनी चोरून नेले.
---