पिंपरी, ता. ७ : पवना नदी सुधार प्रकल्पाला पर्यावरण ना हरकत दाखला देण्यास राज्य पर्यावरण समितीने नुकतीच मान्यता दिली. त्यामुळे या प्रकल्पाला गती देण्याचा मार्ग मोकळा झाला आहे.
पिंपरी-चिंचवड महापालिकेने पवना नदी सुधार प्रकल्पाचा सविस्तर प्रकल्प आराखडा तयार केला. मात्र, त्यातील महत्त्वाची बाब असणारा पर्यावरण ना हरकत दाखला मिळवण्यासाठी राज्य पर्यावरण समितीकडे पाठपुरावा सुरू होता. याबाबत नुकतीच बैठक झाली. त्यात हा निर्णय घेण्यात आला पवना नदी सुधार प्रकल्पासाठी सुमारे १,५०० कोटी खर्च अपेक्षित आहे. केंद्र शासन व राज्य शासनाकडे निधीसाठी मागणी करण्यात आली आहे.

पवना नदी सुधार प्रकल्पासाठी पर्यावरण ना हरकत दाखला मिळाला आहे. आता निधी उपलब्ध करण्याचा पर्याय शोधला जाईल. त्यानंतर नदी सुधारच्या कामाची निविदा प्रक्रिया राबविली जाईल. पुढील तीन महिन्यांत निविदा प्रक्रिया राबवून कामाचे आदेश दिल्यानंतर प्रत्यक्ष कामाला सुरुवात होईल.
- संजय कुलकर्णी, मुख्य अभियंता, पर्यावरण अभियांत्रिकी विभाग

पवना नदी सुधार प्रकल्पासाठी पर्यावरण ना हरकत दाखला मिळण्यासाठी मी पाठपुरावा केला. आता हा दाखला मिळाला आहे. पावसाळी अधिवेशनात राज्य सरकारने प्रकल्पास अपेक्षित १,५०० कोटींचा निधी उपलब्ध करुन द्यावा, अशी मागणी मुख्यमंत्री देवेंद्र फडणवीस यांच्याकडे केली आहे.
- संदीप वाघेरे, माजी नगरसेवक