सोमाटणे : शेतकऱ्यांनी आधुनिक पद्धतीने शेती करावी. कमी जागेत अधिक उत्पादन मिळवावे, असे मार्गदर्शन कृषीकन्या रिद्धी बोत्रे, माया धडस, आयुषी देसाई, मृदुला लांडगे, स्वानंदिनी लोखंडे, सानिका वाशिवले यांनी गहुंजे येथे केले. आकुर्डी येथील डॉ. डी. वाय. पाटील कृषी व्यवसाय व्यवस्थापन महाविद्यालयाच्या वतीने वृक्षारोपण करत कृषीदिन साजरा करण्यात आला. ‘कृषीकन्या’ उपक्रमाअंतर्गत प्रात्याक्षिकांसह शेतकरी प्रशिक्षण उपक्रम येथे आयोजित करण्यात आला. यावेळी शेतकऱ्यांना वृक्षारोपणाचे महत्त्व, अधिक उत्पादन व रोगमुक्त पीक उत्पादन घेण्याचे तंत्र, आधुनिक शेती पद्धतीचे फायदे, नैसर्गिक कीटनाशके व खतांचा वापर, पाणी व्यवस्थापन, माती परीक्षणाचे महत्त्व आदी विषयांचे प्रात्याक्षिकांसह मार्गदर्शन कृषीकन्यांच्या वतीने करण्यात आले. यावेळी सरपंच कुलदीप बोडके, सदस्य हिरामन आगळे, उद्योजक निखील बोडके, विश्वास येवले यांच्या हस्ते जिल्हा परिषद शाळेच्या प्रांगणात झाडांची लागवड करण्यात आली. या उपक्रमात गहुंजे येथील शेतकरी, प्राथमिक शाळेतील विद्यार्थी, शिक्षक सहभागी झाले.
PNE25V29847