पुणे, ता. १४ : ‘आधुनिक चिकित्सा औषधशास्त्र अभ्यासक्रम’ (सीसीएमपी) पूर्ण केलेल्‍या होमिओपॅथिक डॉक्‍टरांची नोंद महाराष्ट्र वैद्यक परिषदेच्‍या (एमएमसी) स्‍वतंत्र नोंदवहीत करण्याच्‍या प्रक्रियेला वैद्यकीय शिक्षण विभागाने स्‍थगिती दिली. तसेच वैद्यकीय शिक्षण संशोधन व आयुष संचालनालयाचे आयुक्‍त यांच्‍या अध्‍यक्षतेखाली एकूण सात जणांची समिती स्थापन करून याबाबत अहवाल सादर करायला सांगितले आहे. मात्र, या ७ जणांच्‍या समितीमध्‍ये एकच होमिओपॅथी डॉक्‍टर असून, बाकी पाच ॲलोपॅथीचे व १ आयुषचा आहे. त्‍यामुळे समितीचा निर्णय तटस्‍थ येण्‍याची शक्‍यता नसून या समितीला होमिओपॅथिक वैद्यकीय संघटनांनी विरोध केला आहे.
‘सीसीएमपी’ उत्तीर्ण झालेल्‍या डॉक्‍टरांची नोंद ‘एमएमसी’ मध्‍ये करण्‍याची वेळ आली. त्‍यावेळी ॲलोपॅथी डॉक्‍टरांनी विरोध करत त्‍याला न्‍यायालयात आव्‍हान दिले. अद्याप त्‍यावर न्‍यायालयाने निर्णय दिलेला नाही. मात्र, वैद्यकीय शिक्षण विभागाने या डॉक्‍टरांची नोंदणी ‘एमएमसी’ च्या स्‍वतंत्र नोंदवहीत ता. १५ पासून करावी, असा आदेश काढला होता. परंतु, या निर्णयाला महाराष्ट्र इंडियन मेडिकल असोसिएशनने विरोध केला. त्‍यांनी मुख्‍यमंत्री देवेंद्र फडणवीस यांची भेट घेत नोंदणी रद्द करण्‍याचा निर्णय मागे घेण्‍याची विनंती केली. त्‍यानुसार वैद्यकीय शिक्षण विभागाने वैद्यकीय शिक्षण संशोधन व आयुष संचालनालयाचे आयुक्‍त यांच्‍या अध्‍यक्षतेखाली एकूण सात जणांची समिती स्थापन करून अहवाल सादर करायला सांगितले आहे. मात्र, यामध्‍ये ॲलोपॅथीच्‍या सदस्‍यांचा भरणा असल्‍याने समितीच्‍या अहवालाच्‍या निष्‍पक्षतेबाबत होमिओपॅथिक डॉक्टर्स संघ, पुणे शाखेच्यावतीने डॉ. बाळकृष्‍ण गायकवाड यांनी आक्षेप घेत समितीमध्‍ये होमिओपॅथिक डॉक्‍टरांची संख्‍या वाढवावी व समितीचे पुनर्गठन करावे, अशी मागणी केली आहे.
राज्यातील तळागाळातील जनतेसह प्रत्येक घटकाला प्रभावी आरोग्यसेवा प्राप्त व्हावी, या करिता विधिमंडळाने मार्च २०१४ मधे अधिनियम पारित केला. त्‍यानुसार राज्यातील नोंदणीकृत वैद्यकीय होमिओपॅथिक वैद्यकीय व्यावसायिकांसाठी शासनमान्य १ वर्षाचा ‘आधुनिक चिकित्सा औषधशास्त्र अभ्यासक्रम’ (सीसीएमपी) पूर्ण केलेल्‍या होमिओपॅथिक डॉक्‍टरांना ॲलोपॅथीची परवानगी दिली. हा अभ्यासक्रम महाराष्ट्र आरोग्य विज्ञान विद्यापीठाद्वारे राज्यातील शासकीय व खासगी वैद्यकीय महाविद्यालयात चालवला जात आहे. गेल्‍या दहा वर्षांत हा अभ्यासक्रम उत्तीर्ण होऊन दहा हजार नोंदणीकृत होमिओपॅथिक डॉक्टर्स रुग्णसेवा देत आहेत. मात्र, त्‍यांना ॲलोपॅथीची प्रॅक्टिस करण्‍यासाठी राजमान्‍यता मिळावी, यासाठी त्‍यांची नोंदणी महाराष्ट्र वैद्यक परिषदेच्‍या (एमएमसी) स्‍वतंत्र नोंदवहीत करणे हे अधिनियमान्वये अनिवार्य आहे, अशी संघटनांची मागणी आहे.
-------------
आम्ही ‘आयएमए’ च्या प्रवृत्‍तीविरोधात बुधवारपासून मुंबईतील आझाद मैदान येथे बेमुदत उपोषण करणार आहोत. शासनाने ‘आयएमए’ च्या दबावाला बळी पडून, होमिओपॅथी डॉक्‍टरांच्‍या नोंदणीच्‍या प्रक्रियेला स्‍थगिती दिली आहे. त्‍याला गांधीवादी मार्गाने विरोध करण्‍यावर आम्ही ठाम आहोत.
– डॉ. बाहुबली शहा, प्रशासक, महाराष्ट्र होमिओपॅथी परिषद
...............
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.