गावठी मद्य विक्रीप्रकरणी गुन्हा
पिंपरी : बेकायदेशीरपणे मद्यविक्री केल्याप्रकरणी एका व्यक्तीवर गुन्हा दाखल करण्यात आला आहे. ही कारवाई मंगळवारी (ता. २२) दुपारी मुळशी तालुक्यातील नेरे दत्तवाडी येथे करण्यात आली. नागोती बळीराम रास्ते (५५, नेरे दत्तवाडी, मुळशी) असे गुन्हा दाखल झालेल्या व्यक्तीचे नाव आहे. पोलिसांनी दिलेल्या माहितीनुसार, सांगवडे रस्त्यावर एक व्यक्ती बेकायदेशीरपणे मद्य विक्री करत असल्याची माहिती हिंजवडी पोलिसांना मिळाली. त्यानुसार पोलिसांनी नागोती याला ताब्यात घेतले. त्याच्याकडून ५५ लिटर मद्य जप्त करण्यात आले आहे.

कोयत्याचा धाक दाखवणाऱ्याला अटक
पिंपरी : कोयत्याचा धाक दाखवून परिसरात दशहत निर्माण करणाऱ्याला काळेवाडी पोलिसांनी अटक केली. ही कारवाई थेरगाव येथे करण्यात आली. सौरभ विकास साठे (२२, निघोजे, खेड) असे अटक केलेल्या तरुणाचे नाव आहे. तो कोयत्याचा धाक दाखवून लोकांमध्ये दहशत निर्माण करत होता. याबाबत माहिती मिळाल्यानंतर पोलिसांनी त्याला ताब्यात घेतले. त्याच्याकडून एक कोयता जप्त केला, असे पोलिसांनी सांगितले.

गुटखा साठा करणाऱ्याला अटक
पिंपरी : तंबाखूजन्य गुटखा आणि तंबाखू साठा करून ठेवल्याप्रकरणी खंडणीविरोधी पथकाने तरुणाला अटक केली. ही कारवाई तळेगाव दाभाडे येथील तपोधाम कॉलनीत करण्यात आली. रमेश उद्धव काळे (३०, तळेगाव दाभाडे) असे अटक केलेल्या व्यक्तीचे नाव आहे. पोलिसांनी दिलेल्या माहितीनुसार, रमेश याने दुकानात गुटखा आणि तंबाखूचा साठा करून ठेवला. खंडणी विरोधी पथकाने १८ हजार ९९८ रुपये किमतीचा हा साठा जप्त केला आहे.

भूमकर चौकात दुचाकींची समोरासमोर धडक
पिंपरी : मुंबई-बंगळूर महामार्गावर भूमकर चौकात दोन दुचाकींची समोरासमोर धडक झाली. हा अपघात २० जुलैच्या रात्री घडला. यामध्ये रणजित दत्तात्रय चांडे (वय ३०, बालेवाडी, पुणे) हा दुचाकीस्वार जखमी झाला आहे. त्यांनी हिंजवडी पोलिसांत फिर्याद दिली आहे. त्यानुसार रोहन मनोहर साळवी (रा.२६, रा. वाकड) याच्याविरोधात गुन्हा दाखल करण्यात आला आहे. रणजित हे त्यांच्या दुचाकीवरून (एमएच ४२/बीए ८६५३) किवळे येथून बालेवाडीत घरी जात होते. भूमकर चौकात रोहन हा दुचाकीवरून (एमएच ०८/एएम ९३२०) विरुद्ध दिशेने आला. त्याने रणजित यांच्या दुचाकीला धडक दिली.