पिंपरी, ता. २८ ः डेंगी मलेरियासारख्या आजारांचा प्रादुर्भाव रोखण्यासाठी पिंपरी-चिंचवड महानगरपालिका आरोग्य विभाग डास निर्मूलनाच्या उपाययोजना करीत आहे. गेल्या महिन्यापासून सुरू झालेल्या प्रतिबंधात्मक कारवाईत २६ लाख २७ हजार इतक्या दंडाची रक्कम वसूल करण्यात आली. औषध फवारणीसह घरे व कंटेनरची तपासणी, भंगार दुकाने, बांधकामस्थळांची पाहणी, तसेच जनजागृती आणि दंडात्मक कारवाईवर भर देण्यात येत आहे. आतापर्यंत सहा लाख १४ हजार ८५५ घरांची तपासणी झाली आहे. त्यापैकी दहा हजार ६०७ घरांच्या परिसरात डासांची उत्पत्ती करणारे वातावरण आढळले. ३२ लाख ५४ हजार ७३८ पैकी ११ हजार ५१२ कंटेनरमध्येही हीच स्थिती आढळली. या कारवाईत तीन हजार ६१२ ठिकाणी नोटिसा बजावण्यात आल्या. ७३९ नागरिक व आस्थापनांवरील दंडात्मक कारवाईत २६ लाखांपेक्षा जास्त दंड वसूल करण्यात आला, अशी माहिती आरोग्य विभागाच्या अधिकाऱ्यांनी दिली.
-----