सोमाटणे, ता. ३१ : येथे ग्रामप्रबोधिनी विद्यालयाच्या वतीने पशुवैद्यकीय शिबिर घेण्यात आले. या शिबिराला उत्स्फूर्त प्रतिसाद लाभला. सध्या बदलत्या हवामानामुळे जनावरांना लाळ्या, खुरकुत, लंपी यासारखे रोग होण्याचा धोका वाढला आहे. या पार्श्वभूमीवर साळुंब्रे येथील ग्रामप्रबोधिनी विद्यालयाने पशुवैद्यकीय विभागाच्या सहकार्याने शाळेत पशुवैद्यकीय आरोग्य तपासणी, उपचार व लसीकरण शिबिराचे आयोजन केले. या उपक्रमात विद्यार्थ्यांनी जनावरे शाळेत आणून सहभाग घेतला. एकूण १५० जनावरांची आरोग्य तपासणी व मोफत लसीकरण करण्यात आले. काही जनावरांचे लसीकरण थेट शेतकऱ्यांच्या गोठ्यात जाऊन करण्यात आले.
‘‘शाळेतील विद्यार्थ्यांनी शेतकऱ्यांसाठी राबवलेल्या या उपक्रमाचे सर्वत्र कौतुक होत आहे. शालेय शिक्षणासोबतच विद्यार्थ्यांनी घरच्या जनावरांची काळजी कशी घ्यावी, याचे प्रत्यक्ष शिक्षण मिळावे यासाठी या उपक्रमाचे आयोजन करण्यात आले होते.
- गणेश भताने, प्रकल्प समन्वयक
---