पिंपरी, ता.२९ : अखिल भारतीय मराठी नाट्य परिषदेच्या पिंपरी चिंचवड शाखेच्या वतीने आयोजित ‘कलाकार कट्टा’ला रसिकांचा प्रतिसाद मिळाला. चिंचवडगावातील राजमाता जिजाऊ उद्यानात पार पडलेल्या कलाकार कट्टयात शाहीर वनिता मोहिते यांच्या संजीवनी महिला शाहिरी पथक यांनी पोवाडा सादर केला.
पारंपरिक वाद्यात ऋषिकेश गायकवाड, जय कसबे, योगेश उकिरडे आणि निखिल झोंबाडे या कलाकारांनी ढोल-ताशा वादन सादरीकरण केले. बालकलाकारांनी नाट्यछटेचे सादरीकरण केले. राजू जाधव आणि सविता इंगळे यांनी कविता, जगदीश खोडके, प्रदीप मांडरे यांनी कराओके, माई गटणे आणि सहकारी यांनी एकनाथी भारूड सादर करून रसिकांची वाहवा मिळवली. या वेळी जुबेन आलीफ शेख यांनी लिहिलेल्या ‘द नॉवेल्टीज’ या दोन अंकी नाट्य पुस्तकाचे प्रकाशन नाट्य परिषदेच्या पिंपरी चिंचवड शाखेचे अध्यक्ष भाऊसाहेब भोईर यांचे हस्ते करण्यात आले. सुहास जोशी, राजू बंग, सीमा गांधी, प्रकाश ढवळे, गौरी लोंढे, पंकज चव्हाण यांनी या कट्याचे नियोजन केले. आसाराम कसबे यांनी प्रस्तावना केली, किरण येवलेकर यांनी आभार मानले. राज आहेरराव यांनी सूत्रसंचालन केले.