तळेगाव दाभाडे, ता. १८ : पुणे-लोणावळा मार्गावर दुपारची लोकल सेवा सुरू करण्याची मागणी सातत्याने होत आहे. पण, ती पुन्हा फेटाळण्यात आली आहे. रेल्वेमंत्री अश्विनी वैष्णव यांनी खासदार श्रीरंग बारणे यांना याबाबत पत्र देत ‘‘रेल्वे ट्रॅक दुरुस्तीमुळे दुपारी १२ ते तीन या वेळेत लोकल गाड्या चालविणे शक्य नाही,’’ असे स्पष्ट नमूद केले आहे.

कोरोना काळापूर्वी दुपारच्या सत्रात दोन लोकल धावत होत्या. कोरोनानंतर रेल्वे सेवा पुन्हा सुरू झाल्या, पण पुणे-लोणावळा मार्गावरील दुपारच्या लोकल बंद ठेवण्यात आल्या आहेत. खासदार श्रीरंग बारणे यांनी हा मुद्दा वारंवार लोकसभेत मांडला. तत्कालीन रेल्वे राज्यमंत्री रावसाहेब दानवे, तसेच सध्याचे रेल्वेमंत्री अश्विनी वैष्णव यांना वेळोवेळी पत्रे देत पाठपुरावा केला. तरीदेखील आजवर सकारात्मक निर्णय न झाल्याने प्रवाशांच्या अपेक्षांवर पाणी फेरले गेले आहे.
ही सेवा बंद असल्याने तळेगाव, कान्हे, टाकवे, उर्से तसेच पिंपरी-चिंचवड औद्योगिक वसाहतीतील कामगारांना दुसऱ्या शिफ्टसाठी वेळेत पोहोचणे कठीण जाते. यासोबतच सकाळ-संध्याकाळच्या गर्दीच्या वेळेत लोकल गाड्यांची कमतरता जाणवतेच; त्यातच दुपारच्या वेळेत सेवा बंद ठेवणे प्रवाशांच्या दैनंदिन जीवनात मोठी अडचण निर्माण करणारे ठरत आहे. त्यामुळे पुणे-लोणावळा दुपारची लोकल सेवा पुन्हा सुरू करण्याची मागणी तीव्र करण्याचे संकेत दिले आहेत.